നിയന്ത്രണം വിട്ട ബൈക്ക് ലോറിക്കടിയില്‍പ്പെട്ട് അപകടം; രണ്ട് യുവാക്കള്‍ മരിച്ചു

​പാലക്കാട്:
ആലത്തൂർ
കുനിശ്ശേരിയിൽ ബൈക്കും ലോറിയും കൂട്ടിയിടിച്ച് ബൈക്ക് യാത്രക്കാരായ രണ്ട് യുവാക്കൾ മരിച്ചു. കൂടെയുണ്ടായിരുന്ന ഒരാൾക്ക് ഗുരുതരമായി പരിക്കേറ്റു. കുനിശ്ശേരി ചെങ്കാരം കല്ലായിൽക്കളം സ്വദേശികളായ സുഭാഷ് (19), രജീഷ് (21) എന്നിവരാണ് മരിച്ചത്. കൂടെയുണ്ടായിരുന്ന സുഖിലിന് (18) ഗുരുതരമായി പരിക്കേറ്റു.
​തിങ്കളാഴ്ച രാത്രി ഏഴ് മണിയോടെ എരിമയൂർ പഞ്ചായത്ത് ഓഫീസിന് സമീപമായിരുന്നു അപകടം. കുനിശ്ശേരി ഭാഗത്തുനിന്ന് തൃപ്പാളൂർ ഭാഗത്തേക്ക് മൂവരും സഞ്ചരിച്ച ബൈക്ക് എതിർദിശയിൽ വന്ന ലോറിയിൽ ഇടിക്കുകയായിരുന്നു. നിയന്ത്രണം വിട്ട ബൈക്ക് ലോറിക്കടിയിലേക്ക് പാഞ്ഞുകയറിയാണ് അപകടമുണ്ടായത്. ബൈക്ക് അമിതവേഗതയിലായിരുന്നുവെന്ന് നാട്ടുകാർ പറഞ്ഞു.
​സുഭാഷ് സംഭവസ്ഥലത്തുതന്നെ മരണപ്പെട്ടിരുന്നു. അപകടസ്ഥലത്തുനിന്നും ഉടൻ തന്നെ രജീഷിനെയും സുഖിലിനെയും ആലത്തൂർ ഇരട്ടക്കുളത്തെ സ്വകാര്യ ആശുപത്രിയിൽ എത്തിച്ചെങ്കിലും രജീഷിന്റെ ജീവൻ രക്ഷിക്കാനായില്ല. പരിക്കേറ്റ സുഖിലിനെ വിദഗ്ദ്ധ ചികിത്സയ്ക്കായി തൃശ്ശൂർ മെഡിക്കൽ കോളേജ് ആശുപത്രിയിലേക്ക് മാറ്റി.
​നിലവിൽ സുഭാഷിന്റെ മൃതദേഹം ആലത്തൂർ താലൂക്ക് ആശുപത്രി മോർച്ചറിയിലും, രജീഷിന്റെ മൃതദേഹം ഇരട്ടക്കുളത്തെ സ്വകാര്യ ആശുപത്രി മോർച്ചറിയിലുമാണ് സൂക്ഷിച്ചിരിക്കുന്നത്.
​സുഭാഷ്:
​അച്ഛൻ: സൂര്യൻ
​അമ്മ: മഞ്ജു
​സഹോദരങ്ങൾ: സൂരജ്, സുജിത്ത്
​രജീഷ്:
​അച്ഛൻ: വാസുദേവൻ
​അമ്മ: രാധാമണി
​സഹോദരങ്ങൾ: രാജീഷ്, രാജിത്ത്