എൽഡിഡബ്ല്യുഎഫ്‌ നേതൃത്വത്തിൽ കർഷക വനിതാദിനം ആചരിച്ചു

പാലക്കാട്‌
ഡൽഹിയിലെ കർഷകസമരത്തിന്‌ ഐക്യദാർഢ്യവുമായി ഇടതു ജനാധിപത്യ മഹിളാ മുന്നണി(എൽഡിഡബ്ല്യുഎഫ്‌)നേതൃത്വത്തിൽ കർഷക വനിതാദിനം ആചരിച്ചു. ജനാധിപത്യ മഹിളാ അസോസിയേഷൻ കുഴൽമന്ദം ഏരിയ കമ്മിറ്റിയംഗം തേങ്കുറിശി സ്വദേശി ദമയന്തി ഓടിച്ച ട്രാക്ടറിനുപിന്നിലാണ് വനിതകൾ അണിനിരന്നത്‌.
പാലക്കാട്‌ അഞ്ചുവിളക്കിന്‌മുന്നിൽ നടക്കുന്ന സംയുക്ത കർഷകസമിതി സത്യഗ്രഹവേദിയിലെത്തി അഭിവാദ്യമർപ്പിച്ചു‌. പാലക്കാട്‌ ഹെഡ്‌ പോസ്‌റ്റ്‌ ഓഫീസിനുമുന്നിൽനിന്ന്‌ പ്രകടനമായി എത്തി‌.
അഞ്ചുവിളക്കിനുമുന്നിൽ ചേർന്ന ഐക്യദാർഢ്യധർണ അഖിലേന്ത്യാ ജനാധിപത്യ മഹിളാ അസോസിയേഷൻ കേന്ദ്രകമ്മിറ്റിയംഗം കെ എസ്‌ സലീഖ ഉദ്‌ഘാടനം ചെയ്‌തു. എൽഡിഡബ്ല്യുഎഫ് ചെയർപേഴ്‌സൺ സുമലത മോഹൻദാസ്‌ അധ്യക്ഷയായി. ജില്ലാ പഞ്ചായത്ത്‌ പ്രസിഡന്റ്‌ കെ ബിനുമോൾ, കേരള മഹിളാ സംഘം സംസ്ഥാന കമ്മിറ്റിയംഗം മല്ലിക വിജയൻ, കേരള കർഷക സംഘം സംസ്ഥാന കമ്മിറ്റിയംഗം ശോഭന പ്രസാദ്‌, ശോഭന (കർഷക യൂണിയൻ)എന്നിവർ സംസാരിച്ചു. എൽഡിഡബ്യുഎഫ്‌ കൺവീനർ സുബൈദ ഇസഹാഖ്‌ സ്വാഗതവും രത്നം നന്ദിയും പറഞ്ഞു.