പുലി ആടുകളെ ആക്രമിച്ചു; നാട്ടുകാർ വനം ഉദ്യോഗസ്ഥരെ തടഞ്ഞു
പൊതുവപ്പാടം വെളുങ്കോട് പുലി ആടുകളെ പിടിച്ചതിനെ തുടർന്ന് പ്രതിഷേധവുമായി എത്തിയ നാട്ടുകാർ വനം വകുപ്പിന്റെ വാഹനം തടഞ്ഞപ്പോൾ.
പാലക്കാട്.മണ്ണാർക്കാട്∙ മൈലാംപാടം പൊതുവപ്പാടം വെളുങ്കോട് പട്ടാപ്പകൽ പുലി ആടുകളെ കടിച്ചു. പ്രതിഷേധവുമായി എത്തിയ നാട്ടുകാർ വനം വകുപ്പ് ഉദ്യോഗസ്ഥരെ തടഞ്ഞു. പുലിയെ പിടിക്കാൻ കൂട് സ്ഥാപിക്കണമെന്നാണ് നാട്ടുകാരുടെ ആവശ്യം. ഇന്നലെ വൈകിട്ട് നാലു മണിയോടെയാണ് മൂന്ന് ആടുകളെ പുലി ആക്രമിച്ചത്. ഒരെണ്ണത്തിനെ കൊന്നു.
മറ്റു രണ്ടെണ്ണത്തിനു സാരമായി പരുക്കേറ്റു. ആടുകളെ മേയാൻ വിട്ടതായിരുന്നു. സംഭവം അറിഞ്ഞ് നാട്ടുകാർ പ്രതിഷേധവുമായി സ്ഥലത്ത് തടിച്ചു കൂടി. വനം വകുപ്പിന്റെ വാഹനം തടഞ്ഞിട്ടു. പുലിയെ പിടിക്കാൻ കൂട് സ്ഥാപിക്കുമെന്ന് ഉറപ്പു നൽകിയാലേ പിരിഞ്ഞു പോകൂ എന്നാണ് നാട്ടുകാർ പറയുന്നത്. എന്നാൽ മുതിർന്ന ഉദ്യോഗസ്ഥരിൽ നിന്ന് അനുമതി ലഭിച്ചാലേ ഇക്കാര്യത്തിൽ ഉറപ്പ് നൽകാൻ കഴിയൂ എന്നാണ് വനം വകുപ്പ് ഉദ്യോഗസ്ഥരുടെ നിലപാട്.
നാട്ടുകാരും വനം വകുപ്പും അവരവരുടെ നിലപാടിൽ രാത്രി വൈകിയും ഉറച്ചു നിൽക്കുകയാണ്. പകലും ജനവാസ കേന്ദ്രങ്ങളിൽ പുലി ഇറങ്ങിയതോടെ നാട്ടുകാർ ഭീതിയിലാണ്. ടാപ്പിങ് ഉൾപ്പെടെയുള്ള ജോലികൾക്കു പോകാൻ കഴിയാത്ത സ്ഥിതിയാണ്. പ്രദേശത്ത് ഭീതി പരത്തുന്ന പുലിയെ പിടികൂടാൻ നടപടി വേണമെന്ന് നാട്ടുകാർ ആവശ്യപ്പെട്ടു.