കിണറ്റിലിറങ്ങി കുടുങ്ങിയയാളെ രക്ഷപ്പെടുത്തി

മണ്ണാർക്കാട്: കുമരംപുത്തൂർ നെച്ചുള്ളിയിൽ കിണറ്റിൽവീണ പശുക്കുട്ടിയെ രക്ഷിക്കാൻ ഇറങ്ങി തിരിച്ചുകയറാൻ കഴിയാതിരുന്നയാളെ ഫയർഫോഴ്സെത്തി രക്ഷപ്പെടുത്തി. തണ്ണീട്ടുകണ്ടത്തിൽ സെബാസ്​റ്റ്യനെയാണ് (60) ഫയർഫോഴ്സ് രക്ഷപ്പെടുത്തിയത്. ഞായറാഴ്ച അയൽവാസിയുടെ കിണറ്റിൽ വീണ പശുക്കുട്ടിയെ രക്ഷിക്കാനായി 45 അടി താഴ്ചയുള്ള കിണറ്റിലിറങ്ങിയതായിരുന്നു ഇദ്ദേഹം. തിരിച്ചുകയറാൻ കഴിയാതെ ശ്വാസതടസ്സം നേരിട്ടതിനെത്തുടർന്ന് നാട്ടുകാർ ഫയർഫോഴ്സിനെ അറിയിച്ചു. ഫയർഫോഴ്‌സെത്തി പശുക്കുട്ടിയെയും സെബാസ്​റ്റ്യനെയും രക്ഷപ്പെടുത്തുകയായിരുന്നു.