മുഖ്യമന്ത്രി കാപട്യം വെടിയണം: മൂവാറ്റുപുഴ അഷ്‌റഫ് മൗലവി

പാലക്കാട്‌ : അക്രമണോല്‍സുക ഫാഷിസത്തെയും അതിന്റെ ഇരകളെയും സമീകരിക്കുന്ന കാപട്യം മുഖ്യമന്ത്രി പിണറായി വിജയൻ ഉപേക്ഷിക്കണമെന്ന് എസ്ഡിപിഐ സംസ്ഥാന പ്രസിഡന്റ് മൂവാറ്റുപുഴ അഷ്‌റഫ് മൗലവി. വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം. ഒന്നാമതായി പിണറായി വിജയൻ വീണ്ടും അധികാരത്തിലെത്തിയത് വോട്ടർമാരുടെ സ്വതന്ത്ര നിലപാടിനേക്കാൾ മാർക്സിസ്റ്റ് പാർട്ടി സൃഷ്ടിച്ച സാമുദായിക ധ്രുവീകരണത്തിൻ്റെ ഫലമാണ്. ന്യൂനപക്ഷ, പിന്നാക്ക ജനതയുടെ സംരക്ഷണത്തിന് കമ്യൂണിസ്റ്റുകളുണ്ടെന്ന മുഖ്യമന്ത്രിയുടെ പ്രസ്താവന സത്യവിരുദ്ധമാണ്. പാര്‍ശ്വവല്‍കൃത ജനവിഭാഗങ്ങള്‍ നേരിടുന്ന ഏത് വിഷയത്തിലാണ് സംരക്ഷകരായി ഇടതുപക്ഷം ഉണ്ടായതെന്ന് മുഖ്യമന്ത്രി വ്യക്തമാക്കണം. സംവരണീയ ജനയത്ക്ക് സാമൂഹിക നീതിയും അധികാര പങ്കാളിത്തവും ഉറപ്പാക്കുന്ന സാമൂഹിക സംവരണത്തെ അട്ടിമറിച്ച് സാമ്പത്തിക സംവരണമെന്ന സവര്‍ണ സംവരണം നടപ്പാക്കിയത് രാജ്യത്ത് ആദ്യമായി കേരളത്തിലെ ഇടതു സര്‍ക്കാരാണ്. ജനങ്ങളെ വര്‍ഗീയമായി വിഭജിക്കുന്നതിന് സംഘപരിവാരം സൃഷ്ടിച്ച ഹലാല്‍ വിവാദത്തില്‍ ഒരേ സമയം പന്നിയിറച്ചി ഉള്‍പ്പെടെ വതരണം ചെയ്ത് ഡിവൈഎഫ്‌ഐ നടത്തിയ ഫുഡ് ഫെസ്റ്റിന്റെ ഉദ്ദേശ ശുദ്ധി എന്താണെന്ന് വ്യക്തമാക്കാനുള്ള ഉത്തരവാദിത്വം മുഖ്യമന്ത്രിക്കുണ്ട്. 8000 ത്തിലധികം നിയമനം നടക്കുന്ന ദേവസ്വം ബോര്‍ഡിലേക്കുള്ള നിയമനത്തിന് പ്രത്യേക ബോർഡ് രൂപീകരിക്കുകയും കേവലം120 ൽ താഴെ ജീവനക്കാരുള്ള വഖ്ഫ് ബോർഡ് നിയമനം പിഎസ് സി ക്കു വിടുന്നതിനു പിന്നിലുള്ള വിവേചനം എളുപ്പം ബോധ്യമാകുന്നതാണ്. പിന്നാക്ക – ന്യൂനപക്ഷ ജനതയെ സംരക്ഷിക്കാൻ തങ്ങളുണ്ടെന്ന മുഖ്യമന്ത്രിയുടെ പ്രസ്താവന കോഴിയെ സംരക്ഷിക്കാൻ താനുണ്ടെന്ന കുറുക്കൻ്റെ അവകാശവാദം പോലെയാണെന്നും അദ്ദേഹം പരിഹസിച്ചു. വാർത്താ സമ്മേളനത്തിൽ എസ്ഡിപിഐ സംസ്ഥാന ജനറൽ സെക്രട്ടറി റോയി അറയ്ക്കൽ, സംസ്ഥാന സമിതിയംഗം അൻസാരി ഏനാത്ത് സംബന്ധിച്ചു.