സുസ്ഥിരമായി പ്രകൃതിയുമായി ഇണങ്ങി ജീവിക്കുക എന്ന സന്ദേശത്തോടെ ജൂൺ അഞ്ച് മുതൽ ഒരാഴ്ചക്കാലം എം ഇ എസ് പാലക്കാട് ജില്ലാ കമ്മിറ്റി പരിസ്ഥിതി വാരാചരണം സംഘടിപ്പിക്കുന്നു.
പരിസ്ഥിതി സംരക്ഷണത്തിന്റെ പ്രാധാന്യവും സന്ദേശവും വിദ്യാർഥികൾക്കിടയിലും യുവജനങ്ങൾക്കിടയിലും എത്തിക്കുക എന്നതാണ് ഈ വാരാചരണത്തിന്റെ ലക്ഷ്യമെന്ന് എം ഇ എസ് പാലക്കാട് ജില്ലാ സെക്രട്ടറി എ. സൈദ് താജുദ്ധീൻ അറിയിച്ചു.
ജില്ലയിലെ എംഇഎസ് വിദ്യാഭ്യാസസ്ഥാപനങ്ങളിൽ ഇതിൻറെ ഭാഗമായി പോസ്റ്റർ രചന, പരിസ്ഥിതി ഫോട്ടോ മത്സരം, ബോധവൽക്കരണ ക്ലാസുകൾ, സെമിനാറുകൾ വൃക്ഷത്തൈ വിതരണം എന്നിവ ഉണ്ടായിരിക്കും.
പാലക്കാട് എംഇഎസ് വനിതാ കോളേജിൽ എംഇഎസ് യൂത്ത്വിങ് ജില്ലാ കമ്മിറ്റിയുടെ നേതൃത്വത്തിൽ സെമിനാർ സംഘടിപ്പിക്കും. തിങ്കളാഴ്ച കാലത്ത് 9 30ന് മുൻസിപ്പൽ കൗൺസിലർ പി ശരവണൻ സെമിനാർ ഉദ്ഘാടനം ചെയ്യും മുൻ ഫോറസ്റ്റ് ഡെപ്യൂട്ടി കൺസർവേറ്റർ കെ ഉമ്മർ വിഷയാവതരണം നടത്തും. ഒലവക്കോട് എം ഇ എസ് സ്കൂളിൽ സാമൂഹ്യ വനവത്കരണ വിഭാഗത്തിന്റെ സഹകരണത്തോടെ വിദ്യാർത്ഥികൾക്ക് ബോധവത്കരണ ക്ലാസ്സ് സംഘടിപ്പിച്ച് വൃക്ഷ തൈ വിതരണം ചെയ്യും.
എംഇഎസ് യൂത്ത് വിങ് മണ്ണാർക്കാട് താലൂക്ക് കമ്മിറ്റിയുടെ നേതൃത്വത്തിൽ വിവിധ വിദ്യാഭ്യാസ സ്ഥാപനങ്ങൾക്ക് വൃക്ഷത്തൈകൾ എത്തിച്ചു നൽകും. മുൻകാലങ്ങളിൽ വൃക്ഷതൈ നട്ട് മികച്ചരീതിയിൽ
പരിപാലിച്ച പ്രവർത്തകരെ അനുമോദിക്കും.
എംഇഎസ് കല്ലടി കോളേജ് മാനേജ്മെൻറ് കമ്മിറ്റി ചെയർമാൻ കെ സി കെ സൈദാലി, പ്രിൻസിപ്പൽ ഡോ. കെ ഹസീന എന്നിവർ പങ്കെടുക്കും.
ആലത്തൂർ താലൂക്കിലെ എൽപി സ്കൂൾ വിദ്യാർത്ഥികൾക്ക് വടക്കഞ്ചേരി എംഇഎസ് വനിതാ കോളേജിലെ അധ്യാപകരും വിദ്യാർത്ഥികളും സ്വരൂപിച്ച വൃക്ഷത്തൈകൾ നൽകും.
ചടങ്ങിൽ ഗ്രാമപഞ്ചായത്ത് പ്രസിഡൻറ് ലിസി സുരേഷ്, വനംവകുപ്പ് വന്യജീവി വിഭാഗം ഡെപ്യൂട്ടി ഡയറക്റ്റർ മനോജ് കൃഷ്ണൻ എന്നിവർ പങ്കെടുക്കും.
പട്ടാമ്പി ആമയൂർ എൽപി സ്കൂളിൽ 25 ഓളം വൃക്ഷത്തൈകൾ നട്ടുപിടിപ്പിക്കും. വിദ്യാർഥികൾക്ക് പച്ചക്കറി തോട്ടം സ്ഥാപിക്കുവാനുള്ള വിത്തുകളും വിതരണം ചെയ്യും.