രഥോത്സവം 7നു കൊടിയേറാനിരിക്കേ ഉത്സവ നടത്തിപ്പിൽ അവ്യക്തത. കോവിഡ് മാനദണ്ഡങ്ങൾ പാലിച്ച് ചടങ്ങുകൾ മാത്രമായി രഥോത്സവം നടത്താൻ ഗ്രാമക്കാർ അനുമതി തേടിയെങ്കിലും സർക്കാരും ജില്ലാ ഭരണകൂടവും ഇതുവരെ നിലപാടു വ്യക്തമാക്കിയിട്ടില്ല.
ഈ മാസം 6 മുതൽ 16 വരെയാണു രഥോത്സവം നടത്തേണ്ടത്.
13ന് ഒന്നാം തേരും 14നു രണ്ടാം തേരും 15നു ദേവരഥ സംഗമവും നടക്കണം. കോവിഡ് സാഹചര്യത്തിൽ വലിയ രഥങ്ങൾ ഒഴിവാക്കി ഗോരഥത്തിലോ പല്ലക്കിലോ ഉള്ള എഴുന്നള്ളത്തിനും ചടങ്ങുകൾക്കുമാണ് ഗ്രാമസമൂഹവും ക്ഷേത്രം ഭാരവാഹികളും അനുമതി തേടിയിരുന്നത്. അതതു ഗ്രാമത്തിലെങ്കിലും ഉത്സവ മൂർത്തികളെ എഴുന്നള്ളിക്കാൻ അനുവദിക്കണമെന്നാണ് ആവശ്യം.
ജനക്കൂട്ടം കർശനമായി ഒഴിവാക്കുമെന്ന് ഉറപ്പുനൽകുകയും ഇക്കാര്യത്തിൽ സർക്കാർ സഹായം അടക്കം തേടുകയും ചെയ്തു. ആഴ്ചകൾക്കു മുൻപു തന്നെ ഇതു സംബന്ധിച്ചു വിശദ അപേക്ഷ നൽകിയിരുന്നെങ്കിലും മറുപടി ലഭിച്ചിട്ടില്ല.
