കൊഴിഞ്ഞാമ്പാറ അഞ്ചാംമൈലിൽ വീടിനുള്ളിൽസ്ത്രീ മരിച്ചനിലയിൽ
പാലക്കാട് :അഞ്ചാംമൈലിൽ വീടിനുള്ളിൽ സ്ത്രീയെ മരിച്ചനിലയിൽ കണ്ടെത്തി. കഴുത്തുഞെരിച്ച്‌ കൊലപ്പെടുത്തിയതായാണ് പോലീസിന്റെ പ്രാഥമിക നിഗമനം. ഒപ്പം താമസക്കുന്നയാളെ പോലീസ് കസ്റ്റഡിയിലെടുത്ത്‌ ചോദ്യം ചെയ്തുതുടങ്ങി.
മൂങ്കിൽമട ഇന്ദിരാനഗർ കോളനിയിലെ ജ്യോതിർമണി (45)യെയാണ് മരിച്ച നിലയിൽ കണ്ടെത്തിയത്. ഇവർക്കൊപ്പം താമസിച്ചിരുന്ന തമിഴ്നാട് ആനമല സ്വദേശി വീരാസ്വമി (46)യെയാണ് പോലീസ് കസ്റ്റഡിയിലെടുത്തത്.
വൈകുന്നേരം അഞ്ചരയോടെ സമീപത്തു താമസിക്കുന്ന വീട്ടമ്മയെത്തി നോക്കിയപ്പോഴാണ് ജ്യോതിർമണി മരിച്ചുകിടക്കുന്നതായി കണ്ടത്. ഉടൻ പോലീസിനെ വിവരമറിയിക്കുകയായിരുന്നു.
ഭർത്താവുമായുള്ള ബന്ധം വേർപെടുത്തിയ ജ്യോതിർമണി ഒരുവർഷത്തോളമായി വീരാസ്വാമിയോടൊപ്പം അഞ്ചാംമൈലിൽ പൂട്ടിക്കിടക്കുന്ന ഭഗവതി മില്ലിന് എതിർവശത്ത് പുറമ്പോക്കിൽ കുടിൽകെട്ടി താമസിക്കുകയാണ്. വീരാസ്വാമിക്ക് തമിഴ്നാട്ടിൽ ഭാര്യയും മക്കളും ഉണ്ടെന്നും പോലീസ് പറഞ്ഞു.
ഞയറാഴ്ച ഉച്ചമുതൽ ഇരുവരും തമ്മിൽ വഴക്ക് നടന്നിരുന്നുവെന്ന് നാട്ടുകാർ അറിയിച്ചതായും പോലീസ് പറഞ്ഞു.
കൊഴിഞ്ഞാമ്പാറ പോലീസ് സ്ഥലത്തെത്തി അന്വേഷണത്തിന് ശേഷം മൃതദേഹത്തിന് കാവൽ ഏർപ്പെടുത്തി. തിങ്കളാഴ്ച ഡോഗ് സ്ക്വാഡും വിരലടയാള വിദഗ്‌ധരും ഫൊറൻസിക് വിഭാഗവും തെളിവെടുപ്പ് നടത്തും. തുടർന്നേ മൃതദേഹം പോസ്റ്റ്മോർട്ടത്തിനായി ജില്ലാ ആശുപത്രിയിലേക്ക് മാറ്റൂ. ഇതിനുശേഷം മാത്രമേ കൂടുതൽ കാര്യങ്ങൾ വ്യക്തമാകൂവെന്ന് കൊഴിഞ്ഞാമ്പാറ സി.ഐ. എം. ശശിധരൻ പറഞ്ഞു.
