പാലക്കാട്: ഖാദി കോസ്റ്റ് ചാർട്ട് പുതുക്കിക്കൊണ്ട്, ഖാദിമേഖലയിലെ തൊഴിലാളികളുടെ വേതനം വർദ്ധിപ്പിക്കണം എന്ന് സർവ്വോദയ സംഘം സ്റ്റാഫ് ആൻറ് ആർട്ടിസാൻസ് അസോസിയേഷൻ എന്ന ഖാദി തൊഴിലാളി സംഘടന യുടെ സ്പെഷ്യൽ ജില്ലാ കൺവെൻഷൻ ആവശ്യപ്പെട്ടു.മിനിമം കൂലി 700 രുപയാക്കുക, ഇൻകം സപ്പോർട്ട് സ്കീം, പ്രൊഡക്ഷൻ ഇൻസെൻ്റീവ് കുടിശ്ശിക തീർത്ത് നല്കുക, ആനുകൂല്യങ്ങൾ സമയബന്ധിതമായി നല്കുക, ഇ.എസ്.ഐ., ക്ഷേമനിധി അംഗത്വം എല്ലാ തൊഴിലാളികൾക്കും കൃത്യമായി നല്കുക, ഖാദി തൊഴിലാളിക്ഷേമനിധിയിൽ നിന്നും വിദ്യാഭ്യാസാനുകൂല്യങ്ങൾ, സാമ്പത്തികവായ്പകൾ എന്നിവ നല്കുക ക്ഷേമനിധി പെൻഷൻ 5000 രുപയാക്കുക തുടങ്ങിയ ആവശ്യങ്ങൾ കൺവെൻഷൻ സർക്കാറിനോട് ആവശ്യപ്പെട്ടു.
സർവ്വോദയ സംഘം സ്റ്റാഫ് ആൻറ് ആർട്ടിസാൻസ് അസോസിയേഷൻ സംസ്ഥാന പ്രസിഡണ്ട് പി.പി.വിജയകുമാർ ഉദ്ഘാടനം ചെയ്തു. ജില്ലാ പ്രസിഡണ്ട് എം .ഗീത അദ്ധ്യക്ഷത വഹിച്ചു. ജില്ലാ സെക്രട്ടറി പി.സുധാമണി, ബിന്ദു അനിൽ, വി.വത്മാവതി, സി.പാഞ്ചാലി, കെ.സജിത, ആർ. ഗീത, കെ.ദീപ, കെ.പി.മോനിഷ, കെ. ശോഭന, എം.വിജയലക്ഷമി എന്നിവർ പ്രസംഗിച്ചു.
