മലയോരമേഖലകളിൽ പ്രതീക്ഷ ഉയർത്തി റബർ വില ഉയരുന്നു -ജോജി തോമസ്

മലയോരമേഖലകളിൽ പ്രതീക്ഷ ഉയർത്തി റബർ വില ഉയരുന്നു.ജോജി തോമസ്
 നെന്മാറ : മലയോര റബ്ബർ കൃഷി മേഖലയിൽ റബ്ബർ വില ഉയരുന്നത് കർഷകരിൽ പ്രതീക്ഷ ഉണർത്തുന്നു. ഒരു കിലോ ഷീറ്റ് റബറിന് 176 രൂപയും ഒരു കിലോ റബ്ബർ പാലിന് 135 രൂപയായും ഉയർന്നതോടെയാണ് റബ്ബർ കൃഷി മേഖല പുതിയ പ്രതീക്ഷകളിൽ എത്തിയത്. ഇതോടെ സർക്കാർ ബഡ്ജറ്റിൽ പ്രഖ്യാപിച്ച താങ്ങു വിലയേക്കാൾ ഉയർന്ന വിലയിലെത്തി. കഴിഞ്ഞവർഷത്തെ സീസണിൽ കർഷകനു കിട്ടിയ ഏറ്റവും ഉയർന്ന വില 165 രൂപയായിരുന്നു. രണ്ടുമാസം മുമ്പ് റബ്ബർ വില 140 രൂപയിൽ താഴെ എത്തിയിരുന്നു. ഓരോ ആഴ്ചയും വില ഉയർച്ചയും താഴ്ചയും രേഖപ്പെടുത്തിയെങ്കിലും കഴിഞ്ഞ ഒരാഴ്ചയായി വില 170 രൂപയ്ക്ക് മുകളിലാണ്. റബർ മരങ്ങൾക്ക് ഷെയ്ഡ് ഇട്ട് ടാപ്പിംഗ് ആരംഭിച്ച റബ്ബർ കർഷകർ മാത്രമേ ഇപ്പോൾ റബ്ബർ ടാപ്പിംഗ് നടത്തുന്നുള്ളൂ. മഴക്കാലമായതിനാൽ ഷീറ്റുകൾ പുകയിട്ട് ഉണക്കി എടുക്കുന്നതിനുള്ള ബുദ്ധിമുട്ട് കണക്കിലെടുത്ത് ബഹുഭൂരിപക്ഷം കർഷകരും റബ്ബർ പാൽ ആയി തന്നെ വിൽക്കുന്നതിനാൽ മാർക്കറ്റിൽ ഷീറ്റുകളുടെ വരവും കുറവാണ്. 60 ശതമാനം ലാറ്റെക്സ് ഉള്ള റബ്ബർ പാലിന് 135 രൂപവരെ കൊഴുപ്പ് (ഡി. ആർ. സി.) അനുസരിച്ച് വില ലഭിക്കുന്നുണ്ട്. കഴിഞ്ഞ വർഷം ശരാശരി ഉയർന്ന ഗ്രേഡിലുള്ള റബ്ബർ ഷീറ്റിന് ലഭിച്ച വിലയാണ് ഇപ്പോൾ റബ്ബർ പാലിന് ലഭിക്കുന്നത്. കയ്യുറകൾ, റബർ ബാൻഡ് , ചിലതരം കുഷൻ തുടങ്ങിയ റബ്ബർ പാൽ ഉപയോഗിച്ച് നിർമ്മിക്കുന്ന വ്യവസായങ്ങൾക്കായാണ് റബ്ബർപാൽ കർഷകരിൽനിന്ന് നേരിട്ട് വാങ്ങുന്നത്. ടാപ്പിംഗ് ചെയ്തു കിട്ടുന്ന റബ്ബർപാൽ അതേപടി അരിച്ച് അമോണിയ ഒഴിച്ച ബാരലുകളിൽ സൂക്ഷിക്കേണ്ട ചുമതല മാത്രമാണ് കർഷകർക്കുള്ളത് ബില്ല് ഇടുന്ന ദിവസം റബ്ബർ പാലിലെ കൊഴുപ്പിന്റെ അളവു നോക്കി കമ്പനികൾ കർഷകർക്ക് പണം നൽകുന്നു.    അമോണിയ നിറച്ച ബാരലുകൾ കർഷകർക്ക് എത്തിച്ചു നൽകുകയും ആവശ്യപ്പെടുമ്പോൾ കൊണ്ടുപോകുകയും കമ്പനികൾ ചെയ്യുന്നതിനാൽ വർഷകാലത്തെ വിറക് ഉപയോഗിച്ച് പൂപ്പൽ പിടിക്കാതെ പുകയിട്ട് ഉണക്കി ഷീറ്റ് ആക്കി മാറ്റേണ്ട ബുദ്ധിമുട്ടിൽ നിന്നും കർഷകർ രക്ഷ നേടുന്നുണ്ട്. വർഷകാലത്ത് ഉത്പാദിപ്പിക്കുന്ന റബ്ബർ ഷീറ്റുകൾ പൂപ്പൽബാധ ഏൽക്കുന്നതിനാൽ കൂടുതൽ കാലം സൂക്ഷിക്കാനും കഴിയാറില്ല. ഷീറ്റ് റബ്ബർ വില ഉയർന്നു നിൽക്കുന്നതിനാൽ കർഷകർ ഉത്പാദിപ്പിക്കുന്ന റബ്ബർ ഷീറ്റുകൾ ഉടൻ വിപണിയിൽ വിൽക്കുന്നുണ്ട്. ചിറ്റൂർ, ആലത്തൂർ മണ്ണാർക്കാട്, ഒറ്റപ്പാലം താലൂക്കുകളിലെ മലയോരമേഖലകളിലാണ് ജില്ലയിൽ കൂടുതൽ റബ്ബർ കൃഷി ഉള്ളത്. പടം മീഡിയ:  പ്ലാസ്റ്റിക് ഷേഡ് പിടിപ്പിച്ച് ടാപ്പിംഗ് നടത്തുന്ന റബ്ബർതോട്ടം