ലക്കിടിയിൽ പന്നിശല്യം; രണ്ടേക്കർ കൃഷി നശിപ്പിച്ചു

ലക്കിടിയിൽ കാട്ടുപന്നിശല്യം രൂക്ഷം. രണ്ടാം വിളയിലെ രണ്ടേക്കറോളം കൃഷി നശിപ്പിച്ചു. അങ്ങിങ്ങായി പാടവരമ്പുകളും കുത്തിനശിപ്പിച്ചിട്ടുണ്ട്. നട്ട് ഒരുമാസം പ്രായമായ നെൽച്ചെടികളാണ് നശിപ്പിച്ചത്. വയൽവരമ്പത്ത് കമ്പി കെട്ടി വിളയ്ക്ക് സുരക്ഷയൊരുക്കിയിരുന്നെങ്കിലും കാര്യമുണ്ടായില്ലെന്ന് കർഷകർ പറഞ്ഞു. രണ്ടാം വിള ആരംഭത്തിൽതന്നെയുള്ള പന്നിശല്യത്തിൽ ആശങ്കയിലാണ് കർഷകർ. വരമ്പ് കുത്തിമറിച്ച് വയലിലേക്കിട്ടത് കാരണം വയലിലെത്താനും വഴിയില്ലാതായെന്ന്‌ കർഷകർ പറഞ്ഞു. മഴ സമയത്ത് കിട്ടാത്തതിനാൽ ഇത്തവണ മംഗലം പാടശേഖരസമിതിയിൽ കർഷകരിൽ പലരും ഒന്നാംവിളയിറക്കിയിരുന്നില്ല. രണ്ടാം വിളയിൽ പ്രതീക്ഷയർപ്പിച്ചിരിക്കുമ്പോഴാണ് തുടക്കത്തിലേയുള്ള പന്നിശല്യം. കല്ലിക്കാട്ടിൽ കുട്ടൻ, രാജൻ, കേലത്ത് വിജയൻ, പുതുവീട്ടിൽ ചന്ദ്രൻ, കുറ്റിപ്ലാവിൽ നാരായണൻ നായർ എന്നിവരുടെ വിളയാണ് ഭാഗികമായി നശിച്ചത്