കൊടുവായൂർ കാക്കയൂരിൽ നിയന്ത്രണം തെറ്റിയ പിക്കപ് വാൻ തോട്ടിലേക്കു മറിഞ്ഞ നിലയിൽ.
കൊടുവായൂർ ∙ കാക്കയൂരിൽ നിയന്ത്രണം തെറ്റിയ പിക്കപ് വാൻ തോട്ടിലേക്കു തലകീഴായി മറിഞ്ഞു. അപകടത്തിൽ പിക്കപ്പിന്റെ ഡ്രൈവർക്കും സഹായിക്കും പരുക്കേറ്റു. നെന്മാറയിലെ ഫർണിച്ചർ കടയിൽ ജീവനക്കാരായ ലിന്റോ(37), അഖിൽ(24) എന്നിവർക്കാണ് പരുക്കേറ്റത്. പരുക്കുകൾ സാരമുള്ളതല്ലെന്നാണു സൂചന.
ഇന്നലെ വൈകിട്ടു ആറരയോടെയാണ് അപകടം. കൊടുവായൂർ ഭാഗത്തു നിന്നു നെന്മാറയിലേക്ക് വന്ന പിക്കപ് മറ്റൊരു വാഹനത്തെ മറികടക്കാൻ ശ്രമിക്കുന്നതിനിടെ എതിരെ വന്ന വാഹനത്തിൽ തട്ടി അപകടം സംഭവിക്കാതിരിക്കാൻ വെട്ടിച്ചു മാറ്റുന്നതിനിടെ നിയന്ത്രണം തെറ്റി പാലത്തിന്റെ കൈവരിക്ക് അരികിലൂടെ തോട്ടിലേക്കു വീഴുകയായിരുന്നു.
അപകടം നടന്നയുടൻ നാട്ടുകാർ വാഹനത്തിനകത്തു കുടുങ്ങിയവരെ പുറത്തെത്തിച്ചു. പുതുനഗരം പൊലീസ് ഇൻസ്പെക്ടർ എ.ആദംഖാന്റെ നേതൃത്വത്തിലുള്ള പൊലീസ് സംഘവും രക്ഷാപ്രവർത്തനത്തിൽ പങ്കാളിയായി. പരുക്കേറ്റവർ നെന്മാറ സാമൂഹിക ആരോഗ്യ കേന്ദ്രത്തിൽ ചികിത്സ തേടി
