പല്ലാവൂർ-കുനിശ്ശേരി. ദുരിത പാത ഉദ്യേഗത്തിൻ്റെ മുൾമുനയിൽ യാത്രികർ.
വാർത്ത. രാമദാസ്. ജി. കൂടല്ലൂർ.
കുനിശ്ശേരി:- പല്ലാവൂർ-കുനിശ്ശേരി മെയിൻ റോഡിൽ, പ്ലാച്ചിക്കാടിനും കുനിശ്ശേരിക്കും ഇടക്കുള്ള പ്രദേശത്തെ മെയിൻ റോഡിലൂടെയുള്ള യാത്രയാണ് ദുഷ്കരമായിരിക്കുന്നത്. മാസങ്ങളായി തകർന്നു കിടക്കുന്ന ഈ പാതയുടെ തകർച്ചയുടെ പ്രധാന കാരണമായി ഏവരും കാണുന്നത് ദിനംപ്രതി ഇതുവഴി കടന്നു പോകുന്ന ഭാരം കയറ്റി പോകുന്ന നൂറു കണക്കിന് ടോറസ് ലോറികളാണെങ്കിലും, ജലസേചന സമയത്ത് വയലുകളിലെത്തുന്ന വെള്ളം റോഡിലേക്ക് ഒഴുകിയെത്തുന്നതും റോഡിന്റെ തകർച്ചയുടെ മറ്റൊരു പ്രധാന കാരണമായി പൊതുജനങ്ങൾ വിലയിരുത്തുന്നു. പ്ലാച്ചിക്കാട് ദേവസ്വംകളത്തിനു സമീപത്തുള്ള ഇതേ റോഡിൽ കുറച്ച് വർഷങ്ങൾക്ക് മുമ്പ് കരിങ്കൽ നിരത്തി റോഡിന് ഉയരം കൂട്ടിയതുപോലെ ഈ ഭാഗത്തിനും ഉയരം കൂട്ടുകയാണ് ഇതിന് ഒരു പ്രതിവിധി എന്ന് ഏവർക്കും അഭിപ്രായമുണ്ട്. അപകടക്കുഴികൾ നിറഞ്ഞ ഈ പ്രദേശത്ത് മിക്കപ്പോഴും ഇരുചക്രവാഹനങ്ങളിൽ സഞ്ചരിക്കുന്നവരാണ് അപകടത്തിൽപ്പെടുന്നത്. വീണ്ടും സ്കൂൾ കാലഘട്ടം സജീവമായതോടെ ഇതുവഴി കടന്നു പോകുന്ന വിദ്യാർത്ഥികളും, രക്ഷിതാക്കളും ഭീതിയോടെയാണ് ഓരോ ദിവസവും കഴിയുന്നത്.
