വൃദ്ധ ദമ്പതികളെ കബളിപ്പിച്ച് 7 ലക്ഷം കവർന്ന മുൻ ബാങ്ക് ജീവനക്കാരൻ മുങ്ങി

മണ്ണാർക്കാട്: തട്ടിപ്പു കഥകളുടെ ശേഖരത്തിലേക്ക് മറ്റൊരു അദ്ധ്യായം കൂടി. വൃദ്ധദമ്പതികൾ ഒരു വീടെന്ന സ്വപ്നത്തോടൊപ്പം ജീവിതസായാഹ്നത്തിലേക്കു കരുതി വച്ച സമ്പാദ്യം മുഴുവൻ തട്ടിയെടുത്ത് ഒപ്പം നിന്ന മുൻ ബാങ്ക് ജീവനക്കാരൻ വിദേശത്തേക്കു കടന്നതായി പരാതി. തെങ്കര ചിറപ്പാടം അയറോട്ട് ചിന്നമാളുവും ഭർത്താവ് കങ്കുമാരെ രാമകൃഷ്ണനുമാണു സമ്പാദ്യമായ 7 ലക്ഷം രൂപ നഷ്ടപ്പെട്ട് മരുന്നു വാങ്ങാൻ പോലും പണമില്ലാതെ ദുരിതത്തിലായത്. മക്കളില്ലാത്ത ചിന്നമാളുവും ഭർത്താവും മാത്രമാണ് വീട്ടിലുള്ളത്. പ്രദേശവാസിയായ രമേഷ് എന്ന വ്യക്തിക്കെതിരെയാണ് ആരോപണം ഉയർന്നിട്ടുള്ളത്.
പാടത്തും പറമ്പിലും പണിയെടുത്തും വർഷങ്ങളായി ഭൂമി പാട്ടത്തിനെടുത്ത് നെല്ലും വാഴയും കൃഷി ചെയ്തും കന്നുകാലികളെയും കോഴിയെയും വളർത്തിയും മറ്റുമാണ് ഉപജീവനം. ഇതിൽ നിന്ന് മിച്ചമുള്ള തുകയും സ്ഥലം വിറ്റ പണവും തറവാട്ടു വിഹിതമായി കിട്ടിയ തുകയും ഉൾപ്പെടെ ബാങ്കിൽ നിക്ഷേപിച്ചിരുന്നു.പൊതുമേഖലാ ബാങ്കിന്റെ തെങ്കര ശാഖയിൽ ദിവസക്കൂലി അടിസ്ഥാനത്തിൽ ജോലി ചെയ്തിരുന്ന തെങ്കര സ്വദേശിയായ രമേഷ് ബാങ്കിലും ആശുപത്രിയിലും പോകാൻ ഇവരെ സഹായിക്കുമായിരുന്നു.
തങ്ങളുടെ വിശ്വാസം ആർജിച്ച് ചെക്കും ഒപ്പും ഉപയോഗിച്ച് നിക്ഷേപം മുഴുവനും ഇയാൾ തട്ടിയെടുത്തതായി ചിന്നമാളു മണ്ണാർക്കാട് ഡിവൈഎസ്പിക്കു നൽകിയ പരാതിയിൽ പറയുന്നു. ഇയാൾ രണ്ടാഴ്ച മുമ്പ് വിദേശത്ത് പോയതായാണ് പറയുന്നത്. പോകുന്നതിന്റെ തലേ ദിവസം ഇയാൾ ഇവരുടെ വീട്ടിലെത്തി ബാങ്കിലെ അക്കൗണ്ട് വിവരങ്ങൾ എന്ന് പറഞ്ഞ് ചില പേപ്പറുകൾ നൽകിയിരുന്നു. മറ്റാരുടെയോ പാസ്ബുക്ക് വിവരങ്ങളടങ്ങിയ പേപ്പറുകളാണ് അതിലുള്ളത് എന്നാണ് മനസ്സിലാക്കുനത്.കഴിഞ്ഞ ദിവസം ആശുപത്രിയിൽ പോകാനുള്ള പണം എടുക്കാനായി ബാങ്കിൽ ചെപ്പോഴാണ് പണം നഷ്ടമായ വിവരം അറിയുന്നത്. തുടർന്നു നടത്തിയ അന്വേഷണത്തിൽ സഹകരണ ബാങ്കിലെ അക്കൗണ്ടിൽ നിന്നും തൊഴിലുറപ്പു ജോലിയുടെ കൂലി വരുന്ന അക്കൗണ്ടിൽ നിന്നും തുക പിൻവലിച്ചതായി കണ്ടെത്തി. സഹകരണ ബാങ്കിലെ അക്കൗണ്ടിലടക്കാൻ നൽകിയ തുകയിലും തട്ടിപ്പ് നടത്തിയിട്ടുണ്ട്. 40000 രൂപ അടക്കാൻ നൽകിയതിൽ 4000 രൂപ മാത്രം അടച്ച് രശീതിയിൽ പേന കൊണ്ട് തിരുത്തിയാണ് ചിന്നമാളുവിന് നൽകിയിട്ടുള്ളത്.ആകെ ഏഴ് ലക്ഷത്തിലധികം രൂപയാണ് തട്ടിയെടുത്തതായി മനസ്സിലാവുന്നത്.
വാർദ്ധക്യ കാലത്തേക്ക് കരുതി വച്ച സമ്പാദ്യം നഷ്ടപ്പെട്ട് ജീവിതം തന്നെ ഒരു ചോദ്യചിഹ്നമായി മാറിയതിന്റെ ആഘാതത്തിലാണ് ഈ വൃദ്ധ ദമ്പതികൾ.