ഷൊർണൂർ: പിഞ്ചുമക്കളെ ശ്വാസംമുട്ടിച്ച് കൊലപ്പെടുത്തിയ കേസിൽ അമ്മയെ പോലീസ് അറസ്റ്റ് ചെയ്തു. മഞ്ഞക്കാട് പരിയംതടത്തിൽ വിനോദിന്റെ ഭാര്യ ദിവ്യയെയാണ് (27) അറസ്റ്റ് ചെയ്തത്.
കൈയിൽ മുറിവുണ്ടാക്കി ആത്മഹത്യയ്ക്ക് ശ്രമിച്ച് ഗുരുതരാവസ്ഥയിലായിരുന്ന ദിവ്യ ആശുപത്രിയിൽ ചികിത്സയിലായിരുന്നു. ചൊവ്വാഴ്ച രാവിലെ ആശുപത്രിയിൽനിന്ന് വിടുതൽ നൽകിയപ്പോഴാണ് അറസ്റ്റ് ചെയ്തത്. ദിവ്യയുടെ മക്കളായ അനിരുദ്ധ് (നാല്), അഭിനവ് (ഒന്ന്) എന്നിവരാണ് കൊല്ലപ്പെട്ടത്. ഭർത്താവിന്റെ അമ്മമ്മയുടെ മാനസിക പീഡനമാണ് കുട്ടികളെ കൊലപ്പെടുത്തി ആത്മഹത്യയ്ക്ക് ശ്രമിക്കാൻ കാരണമെന്ന് ദിവ്യ പോലീസിനോട് പറഞ്ഞു. സാമ്പത്തികമായി പിന്നാക്കംനിൽക്കുന്ന കുടുംബത്തിൽനിന്ന് വന്നതിനെക്കുറിച്ചുള്ള അധിക്ഷേപങ്ങൾ ഉണ്ടായിരുന്നതായും മൊഴിയിലുണ്ട്. ഇക്കാരണങ്ങൾകൊണ്ട് ഭർത്താവിന്റെ അമ്മമ്മ കുട്ടികളെ ഉപദ്രവിച്ചിരുന്നതായും ദിവ്യ പോലീസിനോട് പറഞ്ഞു.
ചൊവ്വാഴ്ച ഉച്ചയോടെ ദിവ്യയെ വിനോദിന്റെ വീട്ടിലെത്തിച്ച് തെളിവെടുപ്പ് നടത്തി. സംഭവത്തിൽ ഭർത്താവിന്റെ അമ്മമ്മ അമ്മിണി അമ്മക്കെതിരെയും പോലീസ് കേസെടുത്തു. ഇൻസ്പക്ടർ. പി.എം. ഗോപകുമാർ, എസ്.ഐ. കെ.വി. വനിൽകുമാർ, എ.എസ്.ഐ. കെ. മധുസൂദനൻ, എ.എസ്.ഐ. ബിന്ദു എന്നിവരുടെ നേതൃത്വത്തിലായിരുന്നു തെളിവെടുപ്പ്.
