മണ്ണാർക്കാട് ബ്ലോക്ക് പഞ്ചായത്ത് പ്രസിഡന്റ് മുസ്ലിം ലീഗ് വിജയിച്ചു

യുഡിഎഫ് ഭരിക്കുന്ന ബ്ലോക്ക് പഞ്ചായത്തിന്റെ പുതിയ പ്രസിഡന്റായി മുസ്ലിം ലീഗിലെ കെ പി ബുഷ്റ സത്യപ്രതിജ്ഞ ചെയ്ത് ചുമതലയേറ്റു. തിങ്കളാഴ്ച രാവിലെ 11 മണിയോടെ ബ്ലോക്ക് പഞ്ചായത്ത് ഹാളിൽ വെച്ചായിരുന്നു തെരഞ്ഞെടുപ്പ്. സിപിഎമ്മിലെ രമാ സുകുമാരനായിരുന്നു എതിർസ്ഥാനർത്ഥി. ബുഷ്റയ്ക്ക് 11 വോട്ടും രമാ സുകുമാരന് നാലു വോട്ടും ലഭിച്ചു. മുൻ പ്രസിഡന്റായിരുന്ന അഡ്വ. സികെ ഉമ്മുസൽമയും സിപിഎമ്മിലെ സി. കെ ജയശ്രീയും യോഗത്തിൽ പങ്കെടുത്തില്ല. ഡിഎഫ്ഒ എംകെ സുർജിത്ത് വരണാധികാരിയായിരുന്നു. സി. കെ ഉമ്മുസൽമയെ യുഡിഎഫ് അവിശ്വാസ പ്രമേയത്തിലൂടെ പുറത്താക്കിയതിനെ തുടർന്നാണ് പ്രസിഡന്റ് പദവയിലേക്ക് തെരഞ്ഞെടുപ്പ് വേണ്ടി വന്നത്. 17 അംഗ ഭരണസമിതിയിൽ നിലവിൽ കോൺഗ്രസ് 06, മുസ്ലിം ലീഗ് 06, സിപിഎം 03, സിപിഐ 01, എൻസിപി 01 എന്നിങ്ങനെയാണ് കക്ഷിനില.