എലപ്പുള്ളി, വാളയാർ സംഭവങ്ങൾ ഗൗരവത്തോടെ കാണും: സിപിഐ എം
പാലക്കാട്
എലപ്പുള്ളി, വാളയാർ ലോക്കൽ സമ്മേളനങ്ങളിൽ സംഘടനാ മാനദണ്ഡങ്ങൾക്ക്‌ വിരുദ്ധമായി എന്തെങ്കിലും നടന്നിട്ടുണ്ടെങ്കിൽ ഗൗരവത്തോടെ കാണുമെന്ന്‌ സിപിഐ എം ജില്ലാ സെക്രട്ടറിയറ്റ്‌ പ്രസ്താവനയിൽ പറഞ്ഞു. ജില്ലയിൽ 3063 ബ്രാഞ്ച്‌ സമ്മേളനം പൂർത്തിയായി. ലോക്കൽ സമ്മേളനങ്ങൾ പകുതിയോളം നടന്നു.
പാർടി അച്ചടക്കം പാലിച്ചും സംഘടനാ രീതിയിൽ ഐക്യത്തിന്റെ സന്ദേശം ഉയർത്തിയുമാണ്‌ സമ്മേളനങ്ങളെല്ലാം നടന്നത്‌. പാർടിക്ക്‌ ഗൗരവമായി ഇടപെടേണ്ട ഒരുപ്രശ്‌നവും സമ്മേളനവുമായി ബന്ധപ്പെട്ട്‌ ജില്ലയിൽ ഇതുവരെയുണ്ടായിട്ടില്ല. എന്നാൽ അതിന്‌ മങ്ങലേൽപ്പിക്കുന്ന വിധമായിരുന്നു എലപ്പുള്ളിയും വാളയാറും ഉണ്ടായത്‌. ആ വിഷയങ്ങൾ അന്വേഷിക്കാനും ശക്തമായ നടപടി സ്വീകരിക്കാനും സെക്രട്ടറിയറ്റ്‌ തീരുമാനിച്ചു.
സംസ്ഥാനത്താകെ പാർടിയിൽ ഉണ്ടായ ഐക്യവും യോജിച്ച പ്രവർത്തനവും തന്നെയാണ്‌ ജില്ലയിലുമുള്ളത്‌.
ഈ രണ്ട്‌ സമ്മേളനങ്ങളിലേത്‌ ഒറ്റപ്പെട്ട സംഭവമായാണ്‌ പാർടി കാണുന്നതെന്നും ജില്ലാ സെക്രട്ടറിയറ്റ്‌ പ്രസ്താവനയിൽ പറഞ്ഞു.
