ബ്രഹ്മാനന്ദ ശിവയോഗി സ്മാരക ഓഡിറ്റോറിയം നിര്മ്മാണോദ്ഘാടനം മന്ത്രി എ.കെ ബാലന് നിര്വഹിക്കും
ആലത്തൂര് ബ്ലോക്ക് പഞ്ചായത്ത് ബ്രഹ്മാനന്ദ ശിവയോഗി സ്മാരക ഓഡിറ്റോറിയം നിര്മാണോദ്ഘാടനം പട്ടികജാതി- പട്ടികവര്ഗ പിന്നാക്കക്ഷേമ -നിയമ- സാംസ്കാരിക- പാർലമെന്ററികാര്യ വകുപ്പ് മന്ത്രി എ.കെ ബാലന് നാളെ (ഒക്ടോബര് 26) രാവിലെ 10 ന് നിര്വഹിക്കും. ആലത്തൂര് ബ്ലോക്ക് പഞ്ചായത്ത് ഹാളില് നടക്കുന്ന പരിപാടിയില് കെ.ഡി പ്രസേനന് എം.എല്.എ അധ്യക്ഷനാവും.
2020-21 സാമ്പത്തിക വര്ഷത്തിലുള്പ്പെടുത്തി സാംസ്കാരിക വകുപ്പിന്റെ 50 ലക്ഷവും ആലത്തൂര് ബ്ലോക്ക് പഞ്ചായത്തിന്റെ 20 ലക്ഷവും വകയിരുത്തിയാണ് സാമൂഹിക-മത വിരുദ്ധ ആചാരങ്ങള്ക്കെതിരെ നിരന്തര പോരാട്ടം നടത്തിയ സാമൂഹിക പരിഷ്കർത്താവ് ബ്രഹ്മാനന്ദ ശിവയോഗിയുടെ പേരിൽ സ്മാരക ഓഡിറ്റോറിയം നിര്മിക്കുന്നത്. ആലത്തൂര് ബ്ലോക്ക് പഞ്ചായത്ത് പരിസരത്താണ് ഓഡിറ്റോറിയം നിര്മിക്കുക.
കോവിഡ് മാനദണ്ഡം പാലിച്ച് നടക്കുന്ന പരിപാടിയില് ആലത്തൂര് ബ്ലോക്ക് പഞ്ചായത്ത് പ്രസിഡന്റ് സി.കെ ചാമുണ്ണി, ബ്ലോക്ക് പഞ്ചായത്ത് വൈസ് പ്രസിഡന്റ് വി. ഹേമലത, ഗ്രാമപഞ്ചായത്ത് പ്രസിഡന്റ് എം.എ നാസര്, ഗ്രാമപഞ്ചായത്ത് ക്ഷേമകാര്യ സ്റ്റാന്ഡിങ് കമ്മിറ്റി ചെയര്പേഴ്സണ് രജനി ബാബു, ബ്ലോക്ക് പഞ്ചായത്ത് സെക്രട്ടറി കെ.പി ചിത്ര എന്നിവര് പങ്കെടുക്കും.
ജില്ലാ ഇൻഫർമേഷൻ ഓഫീസ്, പാലക്കാട്
