വീട്ടിൽ കയറി കാട്ടുപന്നി ആക്രമണം

മണ്ണാർക്കാട്
വീട്ടിൽ കയറി കാട്ടുപന്നി നടത്തിയ ആക്രമണത്തിൽ വീട്ടമ്മ ഉൾപ്പെടെ രണ്ടുപേർക്ക്‌ പരിക്കേറ്റു. കോട്ടോപ്പാടം പഞ്ചായത്തിലെ കണ്ടമംഗലത്ത്‌ വ്യാഴം പകൽ 12 നാണ് സംഭവം. കണ്ടമംഗലം പുതുപ്പറമ്പിൽ ചിന്നമ്മ (60), പള്ളിവാതുക്കൽ ലാലു ജോർജ് (34) എന്നിവർക്കാണ്‌ പരിക്ക്‌. വീട്ടിൽ ടിവി കാണുന്നതിനിടെ ഓടിക്കയറിയ പന്നി ആക്രമിക്കുകയായിരുന്നു. ചിന്നമ്മയുടെ കാലിന് പരിക്കേറ്റു. ബഹളം വച്ചതിനെത്തുടർന്ന് മുറിയിൽ ഓടി നടന്ന പന്നി പിന്നീട് പുറത്തേക്കോടി.
തുടർന്നാണ്‌ ലാലു ജോർജിനെ ആക്രമിച്ചത്. പറമ്പിലെ കൃഷിയിടത്തിൽ നിന്ന ലാലു ജോർജിനെ പന്നി കുത്തിമറിച്ചിട്ടു. കാലിന് സാരമായ പരിക്കേറ്റു. പരിക്കേറ്റ ഇരുവരേയും വട്ടമ്പലം സ്വകാര്യ ആശുപത്രിയിൽ പ്രവേശിപ്പിച്ചു.
വന്യമൃഗശല്യം പരിഹരിക്കണമെന്നാവശ്യപ്പെടുന്നതല്ലാതെ ശാശ്വത പരിഹാരം കാണുന്നതിന് വനംവകുപ്പ് ഒന്നും ചെയ്യുന്നില്ലെന്ന് കർഷകസംഘടനാ പ്രതിനിധികളും കർഷകരും പറയുന്നു.
കോട്ടോപ്പാടം പഞ്ചായത്തിലെ മലയോരമേഖലയിലെ വന്യമൃഗശല്യം പരിഹരിക്കാൻ വനംവകുപ്പ് ഇടപെടണമെന്നാവശ്യപ്പെട്ട് മൂന്നാം വാർഡ് അംഗം ലിജോ വർഗീസ് അവതരിപ്പിച്ച പ്രമേയം ഐകകണ്‌ഠ്യേന പാസായി. എംഎൽഎ, എംപി എന്നിവർക്ക്‌ നിവേദനം നൽകി.