പാലക്കാട് കഞ്ചിക്കോട് ഐ ഐ ടി ക്യാമ്പസിൽ കാട്ടാനക്കൂട്ടമിറങ്ങി. 17 കാട്ടാനകളാണ് ഐഐടി കാമ്പസിൽ മതിൽക്കെട്ട് തകർത്തെത്തിയത്. ഏറെ നേരം പരിഭ്രാന്തി പരത്തിയ ആനയെ പടക്കം പൊട്ടിച്ചാണ് കാട് കയറ്റിയത്.
കുട്ടികളുൾപ്പെടെ 17 ആനകളാണ് കഞ്ചിക്കോട്ടെ ഐ ഐ ടി ക്യാമ്പസിലെത്തി പരിഭ്രാന്തി പരത്തിയത്. കഞ്ചിക്കോട് വലിയേരിയിൽ ആദ്യമെത്തിയ കാട്ടാനക്കൂട്ടത്തെ നാട്ടുകാർ പടക്കം പൊട്ടിച്ച് തുരത്തി. ഇവിടെ നിന്നുമാണ് ആനക്കൂട്ടം മതിൽ തകർത്ത് ഐ ഐ ടി ക്യാമ്പസിലെത്തിയത്. ഐ ഐ ടിയുടെ പുതിയ കെട്ടിടം നിർമിക്കുന്ന സ്ഥലത്ത് രണ്ട് മണിക്കൂറോളം കാട്ടാനക്കൂട്ടമുണ്ടായിരുന്നു.
വന വകുപ്പും, നാട്ടുകാരും പടക്കം പൊട്ടിച്ച് ഏറെ പരിശ്രമിച്ചാണ് കാട്ടാനക്കൂട്ടത്തെ കാട് കയറ്റിയത്. കഞ്ചിക്കോട് മേഖലയിൽ കാട്ടാന ശല്യം രൂക്ഷമാണ്. കാർഷികവിളകൾ വ്യാപകമായി നശിപ്പിക്കാറുണ്ട്. ജനവാസ മേഖലയിൽ കാട്ടാനകളിറങ്ങുന്നത് പതിവായതോടെ ജനങ്ങൾ ഭീതിയിലാണ്.
