മദ്യപിച്ച് വീട്ടീലെത്തിയ ഭര്‍ത്താവ് ഭാര്യയെ വെട്ടി പരിക്കേല്‍പ്പിച്ചു.

അയിലൂര്‍: മദ്യപിച്ച് വീട്ടീലെത്തിയ ഭര്‍ത്താവ് ഭാര്യയെ വെട്ടി പരിക്കേല്‍പ്പിച്ചു. അയിലൂര്‍ ചക്രായ് നൂറം അമ്പിളിയ്ക്കാണ്(31) വെട്ടേറ്റത്. ഇവരെ പാലക്കാട് ജില്ലാ ആശുപത്രിയില്‍ പ്രവേശിപ്പിച്ചു. സംഭവത്തില്‍ ഭര്‍ത്താവ് ജിജോയെ(38) നെന്മാറ പോലീസ് അറസ്റ്റു ചെയ്തു. ചൊവ്വാഴ്ച വൈകീട്ട് ആറു മണിയ്ക്കാണ് സംഭവം.
സ്ഥിരമായി മദ്യപിച്ചെത്തുന്ന ജിജോ ഭാര്യയെ ഉപദ്രവിക്കുന്നത് പതിവാണെന്ന് പ്രദേശവാസികള്‍ പറയുന്നു. ചൊവ്വാഴ്ച വൈകീട്ട് വീട്ടിലെത്തിയ ജിജോ ഭാര്യയുമായി വഴക്കിടുകയും വീട്ടിലുണ്ടായിരുന്ന കത്തിയുപയോഗിച്ച് തലയ്ക്ക് വെട്ടുകയായിരുന്നു. ബഹളം കേട്ട സമീപവാസികള്‍ ഉടന്‍ തന്നെ നെന്മാറ സാമൂഹ്യാരോഗ്യകേന്ദ്രത്തിലും പിന്നീട് ജില്ലാ ആശുപത്രിയിലും പ്രവേശിപ്പിച്ചു. സംഭവത്തിനു ശേഷം ജിജോ തൊട്ടടുത്ത വനമേഖലയിലേക്ക് ഓടിയൊളിച്ചുവെങ്കിലും പോലീസ് നടത്തിയ പരിശോധനയില്‍ പിടികൂടുകയായിരുന്നു. പരിക്കേറ്റ അമ്പിളിയുടെ തലയില്‍ അഞ്ച് സ്റ്റിച്ചാണുള്ളത്.