നിരവധി കേസുകളിലെ പ്രതി കൊല്ലങ്കോട് പൊലീസ് പിടിയിൽ

നിരവധി കേസുകളിൽ പ്രതിയായ അന്തർജില്ലാ കുറ്റവാളിയെ കൊല്ലങ്കോട് പൊലീസ് വാഹനപരിശോധനക്കിടെ പിടികൂടി. കണ്ണൂർ അണ്ടലൂർ പേയാട് സ്വദേശി അമൽജിത്ത്(24)ആണ് പിടിയിലായത്‌. വടവന്നൂരിൽ ശനിയാഴ്‌ച ഉച്ചയ്‌ക്ക് വാഹന പരിശോധനയ്ക്കിടെ  അതുവഴി ഇരുചക്രവാഹനത്തിൽ വന്ന അമൽജിത്തിനെ പൊലീസ് ചോദ്യംചെയ്തപ്പോഴാണ് നിരവധി കേസുകളിലെ കുറ്റവാളിയും കൊല്ലങ്കോട് പൊലീസ് തിരയുന്ന പ്രതിയുമാണെന്ന് മനസ്സിലായത്. -വാഹനമോഷണം, വ്യാപാരസ്ഥാപനങ്ങൾ കുത്തിത്തുറന്ന് മോഷണം, ഭവനഭേദനം, പിടിച്ചുപറി, കവർച്ച, പോക്സോ, ലഹരിമരുന്ന് കടത്തൽ, മനഃപൂർവമല്ലാത്ത നരഹത്യ തുടങ്ങി അമ്പതോളം കേസുകളിൽ പ്രതിയാണ്. മോഷ്ടിച്ച ബൈക്കിൽ കറങ്ങി നടക്കുന്ന അമൽജിത്ത് കുറെക്കാലമായി വടക്കഞ്ചേരിയിലാണ് താമസം. ജുവൈനൽ ഹോം, കണ്ണൂർ, വിയ്യൂർ ജയിലുകളിൽ തടവുശിക്ഷ അനുഭവിച്ചിട്ടുണ്ട്. കൊല്ലങ്കോട്, വടക്കഞ്ചേരി, ആലത്തൂർ, ചിറ്റൂർ, ചെറുതുരുത്തി, വിയ്യൂർ, ശ്രീകണ്ഠപുരം, ഇരിക്കൂർ, ന്യൂ മാഹി സ്റ്റേഷൻപരിധിയിലെ നിരവധി കേസുകളിൽ പ്രതിയാണ്.