ലാബ് പരിശോധനയില്‍ ​ഗുരുതര പിഴവെന്ന് പരാതി

പാലക്കാട്
കോവിഡുമായി ബന്ധപ്പെട്ട നടത്തുന്ന ഡി ഡിമ്മർ പരിശോധനയിൽ ജില്ലയിലെ സ്വകാര്യ ലാബിൽ വീഴ്ചയെന്ന് ആക്ഷേപം. പാലക്കാട് ന​ഗരത്തിലെ ലാബിലാണ് പരിശോധനയിൽ വലിയ പിഴവുണ്ടായത്‌. കോവിഡ് ബാധിച്ചവർക്ക് രക്തം കട്ടപിടിക്കുന്നുണ്ടോ എന്ന് പരിശോധിക്കാനാണ് ഡി ഡിമ്മർ പരിശോധന നടത്തുന്നത്.
ലാബിൽ നടത്തിയ പരിശോധനയിൽ രക്തം കട്ടപിടിക്കാത്ത രോ​ഗിക്കും കാര്യമായ രീതിയിൽ രക്തം കട്ടപിടിച്ചിട്ടുണ്ടെന്നാണ് ഫലം ലഭിച്ചത്. ഈ റിപ്പോർട്ട് അനുസരിച്ച് രോ​ഗി 21 തവണ ഇഞ്ചക്ഷൻ എടുക്കുകയും മരുന്ന് കഴിക്കുകയും ചെയ്തു. തുടർന്ന് രോ​ഗിക്ക് ആരോ​ഗ്യ പ്രശ്നങ്ങളുമുണ്ടായി. തുടർന്ന് മറ്റ് രണ്ട് ലാബുകളിൽ നടത്തിയ പരിശോധനയിൽ രക്തം കട്ടപിടിച്ചിട്ടില്ലെന്ന് കണ്ടെത്തി.
ലാബിലെ ​ഗുരുതര പിഴവിനെതിരെ രോ​ഗി നേരിട്ടെത്തി പരാതി പറഞ്ഞു. പരിശോധന ഉപകരണം കേടായതാണ് ഫലം തെറ്റാൻ കാരണമെന്നാണ് ലാബിന്റെ വിശദീകരണം.