ഒറ്റപ്പാലം: ഒറ്റപ്പാലം റവന്യൂ ഡിവിഷന്റെ 64-ാം സബ്കളക്ടറായി കൊല്ലം സബ്കളക്ടർ ശിഖ സുരേന്ദ്രൻ ചുമതലയേൽക്കും. ഒറ്റപ്പാലത്ത് സബ്കളക്ടറായി ചുമതലയേൽക്കുന്ന 28-ാം ഐ.എ.എസ്. ഉദ്യോഗസ്ഥയാണ്.
എറണാകുളം വടയമ്പാടി സ്വദേശിയായ ശിഖ സുരേന്ദ്രൻ 2018 ബാച്ചിലാണ് സിവിൽ സർവീസ് പരീക്ഷയിൽ 16-ാം റാങ്കോടെ ഐ.എ.എസ്. നേടിയത്. ആദ്യം 2019 മേയിൽ കോട്ടയം അസിസ്റ്റന്റ്‌ കളക്ടറായി ഔദ്യോഗിക ജീവിതത്തിലേക്ക് കടന്നു. 2020 സെപ്റ്റംബറിലാണ് കൊല്ലം സബ്കളക്ടറായി ചുമതലയേൽക്കുന്നത്. അവിടെ എട്ടുമാസംമാത്രം ജോലിയിലിരിക്കെയാണ് പുതിയ നിയമനം.
കടയിരുപ്പ് ഗവ. ഹയർസെക്കൻഡറി സ്കൂളിലും കോലഞ്ചേരി സെൻറ്‌ പീറ്റേഴ്‌സ് സ്കൂളിലുമായിരുന്നു വിദ്യാഭ്യാസം. പിന്നീട് കോതമംഗലം എം.എ. കോളേജിൽനിന്ന് സിവിൽ എൻജിനിയറിങ്ങിൽ ബിരുദവും നേടി. വടയമ്പാടി കാവനാക്കുടിയിൽ വീട്ടിൽ പരേതനായ സുരേന്ദ്രന്റെയും സിലോയുടെയും മകളാണ്. റവന്യൂവകുപ്പിൽ ക്ലാർക്കാണ് ഭർത്താവ് അനൂപ് അച്യുതൻ.
