നിയന്ത്രണം ലംഘിച്ച് വിവാഹം, കേസ്; കടുപ്പിച്ച് പൊലീസ്
വടക്കഞ്ചേരി∙ മേഖലയിൽ കോവിഡ് വ്യാപനം രൂക്ഷമായതോടെ നിയന്ത്രണം കടുപ്പിച്ച് പൊലീസ്.
നിയമം പാലിക്കാത്തവർക്കെതിരെ ശക്തമായ നടപടികളാണ് പൊലീസ് സ്വീകരിക്കുന്നത്. ഇന്നലെ കോവിഡ് നിയന്ത്രണം ലംഘിച്ച 10 പേർക്കെതിരെ പൊലീസ് കേസെടുത്തു. ടൗണിലും മലയോര ഗ്രാമീണ മേഖലയിലും പൊലീസ് കോവിഡ് ബോധവൽക്കരണം നടത്തിയതിന് പുറമേ നടപടിയും ശക്തമാക്കി. ബസ് സ്റ്റാൻഡിലും ബസ് സ്റ്റോപ്പുകളിലും, വിവിധ കേന്ദ്രങ്ങളിലും കോവിഡ് ബോധവൽക്കരണ പരിപാടികളും മൈക്ക് അനൗൺസ്മെന്റും നടത്തി. നിർബന്ധമായും ശരിയായ വിധം മാസ്ക് ധരിക്കണമെന്നും ബസുകളിൽ യാത്രക്കാർ നിന്ന് യാത്ര ചെയ്യുന്ന സ്ഥിതി ഉണ്ടാകരുതെന്നും ഓട്ടോറിക്ഷ അടക്കമുള്ള വാഹനങ്ങളിലെ ഡ്രൈവർമാർ നിബന്ധനകൾ പാലിക്കണമെന്നും നിർദേശം നൽകി.
വടക്കഞ്ചേരി സിഐ വി.പി.ഷാജൻ നേതൃത്വം നൽകി. ഇന്നലെ കോവിഡ് രോഗികളായ രണ്ട് സ്ത്രീകൾ വടക്കഞ്ചേരിയിൽ നിന്നു പാലക്കാട്ടേക്ക് ഓട്ടോറിക്ഷയിൽ സഞ്ചരിച്ചതിനെത്തുടർന്ന് ആരോഗ്യ വകുപ്പ് അധികൃതർ നടപടി സ്വീകരിച്ചു. ഓട്ടോ ഡ്രൈവറെ ക്വാറന്റീനിൽ പോകാന് നിർദേശിച്ചു. ഇവർ രാവിലെ പ്രഭാതസവാരിക്ക് ഇറങ്ങിയതായും ആരോഗ്യ വകുപ്പ് അധികൃതർ പറഞ്ഞു. ഹെൽത്ത് ഇൻസ്പെക്ടറുടെ റിപ്പോർട്ടിന്റെ അടിസ്ഥാനത്തിൽ ഇവർക്കെതിരെ കേസെടുക്കുമെന്ന് സിഐ പറഞ്ഞു
