മലമ്പുഴ മണ്ഡലത്തിലെ എസ് . യു. സി. ഐ കമ്മ്യൂണിസ്റ്റ് പാർട്ടി സ്ഥാനാർഥി കെ.പ്രസാദ് നാമനിർദേശപത്രിക സമർപ്പിച്ചു. മണ്ഡലത്തിലെ ആദ്യത്തെ നാമനിർദ്ദേശ പത്രികയാണിത്. ഇത് മലമ്പുഴ മണ്ഡലം വരണാധികാരി മുമ്പാകെ ഇന്ന്(15.3.2021) രാവിലെ 11 മണിക്കാണ് പത്രിക സമർപ്പിച്ചത്. പാർട്ടി പ്രവർത്തകരോടൊപ്പം ആണ് പത്രിക സമർപ്പിക്കുവാൻ എത്തിയത് .
മലമ്പുഴ മണ്ഡലത്തിലെ സ്ഥാനാർത്ഥിയായി മത്സരിക്കുന്ന സഖാവ് കെ. പ്രസാദ് രണ്ടു പതിറ്റാണ്ടായി പാലക്കാട് ജില്ലയിൽ പാർട്ടിയുടെ സജീവ സംഘാടകനായി പ്രവർത്തിച്ചുവരികയാണ്. ഒരു സാധാരണ തൊഴിലാളി കുടുംബത്തിൽ പിറന്ന അദ്ദേഹം, അസംഘടിത നിർമ്മാണ തൊഴിലാളികളെ സംഘടിപ്പിച്ചു കൊണ്ട് അവരുടെ അവകാശ പോരാട്ടങ്ങളിലും ക്ഷേമ പ്രവർത്തന രംഗത്തുണ്ട്. പാർട്ടിയുടെ തൊഴിലാളി വർഗ്ഗ മുന്നണി സംഘടനയായ എ.ഐ.യു.റ്റി.യു.സി യുടെ ജില്ല ജോയിൻറ് സെക്രട്ടറിയും സംസ്ഥാന കമ്മിറ്റി അംഗവുമാണ്.
തൊഴിലാളികളുടേയും കർഷകരുടേയും അതു പോലെ കുടിയിറക്കപ്പെടുന്ന ജനങ്ങളുടേയും ഒപ്പം നിലകൊണ്ടു കൊണ്ട് അവരുടെ പ്രക്ഷോഭങ്ങളിൽ സർവ്വദാ വ്യാപൃതനാണ്. യുവാക്കളുടെ നീറുന്ന പ്രശ്നങ്ങൾ, മദ്യം,മയക്കുമരുന്ന് ഇവയുടെ വ്യാപനം, സ്ത്രീകൾക്കും കുഞ്ഞുങ്ങൾക്കും എതിരെ നടക്കുന്ന അതിക്രമങ്ങൾ ഇവയ്ക്കെതിരെയുള്ള പോരാട്ടങ്ങളിലും നിറസാന്നിധ്യമാണ് കെ. പ്രസാദ്
കുത്തകകൾക്കുവേണ്ടി ജനങ്ങളെ ദ്രോഹിക്കുന്ന മുന്നണികളെ പരാജയപ്പെടുത്തുക, ജന സമര രാഷ്ട്രീയത്തെ ശക്തിപ്പെടുത്തുക എന്നീ മുദ്രാവാക്യങ്ങൾ ഉയർത്തി കൊണ്ടാണ് എസ് യു സി ഐ കമ്മ്യൂണിസ്റ്റ് പാർട്ടി തെരഞ്ഞെടുപ്പിനെ നേരിടുന്നത്. മലമ്പുഴ അടക്കം കേരളത്തിൽ 37 മണ്ഡലങ്ങളിലാണ് പാർട്ടി ഈ മുദ്രാവാക്യം ഉയർത്തിക്കൊണ്ട് മത്സരിക്കുന്നത്. ഇതിനോടകം തന്നെ സ്ഥാനാർഥി മലമ്പുഴ മണ്ഡലത്തിൽ പ്രചാരണ പ്രവർത്തനം ആരംഭിച്ചു കഴിഞ്ഞു.