മുണ്ടൂർ: കർഷക സമരങ്ങളോട് ഐക്യദാർഢ്യം പ്രഖ്യാപിച്ചുകൊണ്ട് കെ.സി.വൈ.എം ഒലവക്കോട് ഫൊറോന ‘മാനിഷാദ’ എന്നപേരിൽ വായ്മൂടിക്കെട്ടി പ്രതിഷേധം സംഘടിപ്പിച്ചു. ഞായറാഴ്ച ഉച്ചകഴിഞ്ഞ് 3.30ന് മുണ്ടൂർ ടൗണിൽ വച്ചാണ് പ്രതിഷേധം നടന്നത്. അന്നം തരുന്ന കർഷകരോട് വലിയ അനീതിയാണ് സർക്കാർ കാണിക്കുന്നത്. ഇതിനെതിരെ ശബ്ദമുയർത്തുന്നവരെ അടിച്ചമർത്തുന്നതിന്റെ പ്രതീകമായിട്ടാണ് വായ്മൂടി കെട്ടി പ്രതിഷേധിച്ചത്.കോവിഡ് പ്രോട്ടോക്കോൾ പാലിച്ച് സമാധാനപരമായ രീതിയിലാണ് പ്രതിഷേധം നടന്നത്. കെ.സി.വൈ.എം ഒലവക്കോട് ഫൊറോന ഡയറക്ടർ ഫാ.ഷൈജു പരിയത്ത്, പ്രസിഡന്റ് ശ്രീ.ജെസ്വിൻ സോണി, സെക്രട്ടറി ശ്രീ.ജെസ്വിൻ റോയ്,വൈസ് പ്രസിഡന്റ് കുമാരി. അനു കെ. എ, ജോയിന്റ് സെക്രട്ടറി കുമാരി. അനു തോമസ്, ട്രഷറർ ശ്രീ.സിജോ റെജി എന്നിവരോടൊപ്പം വിവിധ യൂണിറ്റ് ഭാരവാഹികളും കെ.സി.വൈ.എം പ്രവർത്തകരും അണിനിരന്നു. കർഷകരോടൊപ്പം കെ.സി.വൈ.എം ഉണ്ടാകും എന്ന് പ്രഖ്യാപിച്ചുകൊണ്ട് നാലുമണിയോടെ പ്രതിഷേധ ജാഥ അവസാനിച്ചു.