പാലക്കാട് ജില്ലയിലെ ജില്ലാ പഞ്ചായത്ത്, 15 ബ്ലോക്ക് പഞ്ചായത്ത്, ഏഴ് നഗരസഭ, 91 ഗ്രാമപ്പഞ്ചായത്ത്, മലപ്പുറം ജില്ലയിലെ ജില്ലാ പഞ്ചായത്ത്, 15 ബ്ലോക്ക് പഞ്ചായത്ത്, 11 നഗരസഭ, 100 ഗ്രാമപ്പഞ്ചായത്ത് എന്നിവിടങ്ങളിലേക്കുള്ള ബാലറ്റുകളുടെ അച്ചടിയാണ് പൂർത്തിയായത്.
തദ്ദേശസ്വയംഭരണ തിരഞ്ഞെടുപ്പിലേക്കുള്ള ബാലറ്റുകൾ അച്ചടി പൂർത്തിയാക്കി വിതരണം ആരംഭിച്ചു. പാലക്കാട്, മലപ്പുറം ജില്ലകളിലേക്കുള്ള ബാലറ്റുകളാണ് ഷൊർണൂർ ഗവ. പ്രസ്സിൽനിന്ന്‌ വിതരണം ചെയ്യുന്നത്.
പ്രസ്സിൽനിന്ന്‌ പരിശോധന പൂർത്തിയാക്കി സീൽചെയ്തുനൽകുന്ന ബാലറ്റുകളടങ്ങിയ പെട്ടികൾ വരണാധികാരികൾ പരിശോധിച്ച് ഉറപ്പുവരുത്തി ട്രഷറികളിൽ സൂക്ഷിക്കും. ഇലക്‌ട്രോണിക്സ് വോട്ടിങ് മെഷീൻ (ഇ.വി.എം.), ടെന്റേഡ്, പോസ്റ്റൽ ബാലറ്റുകളാണ് പ്രസ്സിൽ തയ്യാറാക്കിയത്. കോവിഡ് പ്രതിസന്ധി രൂക്ഷമായസാഹചര്യത്തിൽ തൃശ്ശൂർമുതൽ കാസർഗോഡുവരെയുള്ള മേഖലകളിലെ തിരഞ്ഞെടുപ്പിനാവശ്യമായ കവറുകളും ഫോമുകളും അച്ചടിച്ചുനൽകുന്നതും ഇവിടെനിന്നാണ്.
