യുവാവ് മരിച്ചത് കാട്ടുപന്നിക്ക് വെച്ച ഷോക്ക് കെണിയില്‍ കുടുങ്ങി! റബര്‍ തോട്ടത്തില്‍ ജഡം കണ്ടെത്തിയ സംഭവത്തിൽ വഴിത്തിരിവ്; 3 പേര്‍ കസ്റ്റഡിയില്‍
യുവാവിൻ്റെ ജഡം റബര്‍തോട്ടത്തില്‍ കണ്ടെത്തിയ സംഭവത്തില്‍ മൂന്നുപേരെ കസ്റ്റഡിയിലെടുത്തു. കാട്ടുപന്നിക്കു വെച്ച ഷോക്ക് കെണിയില്‍ കുടുങ്ങിയാണ് യുവാവ് മരിച്ചതെന്നാണ് പുറത്തുവരുന്ന വിവരം.
പാലക്കാട്: വടക്കഞ്ചേരി പുതുക്കാടിന് സമീപം യുവാവിൻ്റെ ജഡം റബര്‍തോട്ടത്തില്‍ കണ്ടെത്തിയ സംഭവത്തില്‍ മൂന്നുപേര്‍ കസ്റ്റഡിയിലെന്ന് സൂചന. യുവാവിൻ്റെ മരണംഷോക്കേറ്റെന്നാണ് പോസ്റ്റു‌മോര്‍ട്ടം റിപ്പോര്‍ട്ട്. പുതുക്കോട് അപ്പക്കാട് യാക്കൂബ് മകന്‍ അജ്മല്‍ (21) നെയാണ് പാട്ടോലക്ക് സമീപം റബ്ബര്‍ തോട്ടത്തില്‍ മരിച്ച നിലയില്‍ കണ്ടെത്തിയത്.
കാട്ടുപന്നിക്കു വെച്ച ഷോക്ക് കെണിയില്‍ കുടുങ്ങിയാണ് യുവാവ് മരിച്ചതെന്നാണ് വിവരം. യുവാവ് മരിച്ചുകിടന്ന സ്ഥലത്തിന് രണ്ടുകിലോമീറ്റര്‍ അപ്പുറത്തുവെച്ചാണ് ഷോക്കേറ്റിട്ടുള്ളത്. കാട്ടുപന്നി കെണിയില്‍ കുടുങ്ങിയോ എന്നറിയാന്‍ കെണിയൊരുക്കിയവര്‍ സ്ഥലത്തെത്തിയപ്പോഴാണ് യുവാവ് മരിച്ചുകിടക്കുന്നത് കണ്ടത്. ഉടനെ മൃതദേഹം അവിടെ നിന്നും മാറ്റി ദൂരെയുള്ള റബര്‍ തോട്ടത്തിലെത്തിച്ച് തെളിവ് നശിപ്പിക്കാന്‍ ശ്രമം നടത്തി.
