ഒലവക്കോട്ട് ട്രെയിനിൽ 40 കിലോഗ്രാം കഞ്ചാവ് ഉപേക്ഷിച്ച നിലയിൽ

∙ ഒലവക്കോട് റെയിൽവേ സ്റ്റേഷനിൽ ട്രെയിനിൽ ഉപേക്ഷിക്കപ്പെട്ട നിലയിൽ 40 കിലോഗ്രാം കഞ്ചാവ് കണ്ടെത്തി. റെയിൽവേ സംരക്ഷണ സേനയുടെ കുറ്റാന്വേഷണ വിഭാഗമാണു കഞ്ചാവ് പിടികൂടിയത്. ഇന്നലെ രാവിലെ 9.50നായിരുന്നു സംഭവം. ഹൈദരാബാദ്– തിരുവനന്തപുരം ശബരി എക്സ്പ്രസിലെ എസ് 5 കോച്ചിൽ സീറ്റിനു താഴെ 4 ബാഗുകളിലായിരുന്നു കഞ്ചാവ് സൂക്ഷിച്ചിരുന്നത്. ഇതോടൊപ്പം ഒരു മൊബൈൽ ഫോണും കണ്ടെത്തി. ഉദ്യോഗസ്ഥരുടെ പരിശോധന കണ്ട് ഉടമ കഞ്ചാവ് ഉപേക്ഷിച്ചു പോയതാകാമെന്ന് എഎസ്ഐ കെ. സജു പറഞ്ഞു. തുടരന്വേഷണത്തിനായി എക്സൈസ് നർകോട്ടിക് വിഭാഗത്തിനു കഞ്ചാവ് കൈമാറി.