തദ്ദേശഭരണ തിരഞ്ഞെടുപ്പ്: മാതൃകാപെരുമാറ്റച്ചട്ടം
തിരഞ്ഞെടുപ്പിനോടനുബന്ധിച്ച് ജാഥ, പൊതുയോഗം എന്നിവയ്ക്കുള്ള നിയന്ത്രണങ്ങള്
യോഗം നടത്തുന്ന സ്ഥലം, ജാഥ കടന്നുപോകുന്ന വഴി എന്നിവ കാണിച്ച് ബന്ധപ്പെട്ട പോലീസ് അധികാരിയില് നിന്ന് മുന്കൂര് അനുമതി രേഖാമൂലം വാങ്ങേണ്ടതാണ്. ഇതുസംബന്ധിച്ചുള്ള കോടതി നിര്ദ്ദേശങ്ങളും പാലിക്കണം.
ജാഥ, പൊതുയോഗം എന്നിവ നടത്തുന്നതിനുള്ള സമയപരിധി
രാത്രി പത്തിനും രാവിലെ ആറിനും ഇടയില് പൊതുയോഗം നടത്തരുത്. ജാഥയോ യോഗമോ പാടില്ല. വോട്ടെടുപ്പ് അവസാനിക്കുന്നതിന് 48 മണിക്കൂര് മുന്പ് മുതല് വോട്ടെടുപ്പ് അവസാനിക്കുന്നത് വരെയുള്ള സമയത്ത് പൊതുയോഗം, ജാഥ എന്നിവ പാടില്ല. ഉദാ: വോട്ടെടുപ്പ് ഡിസംബര് 10ന് രാവിലെ 7 മുതല് വൈകിട്ട് 6 വരെയാണെങ്കില് പൊതുയോഗം, ജാഥ എന്നിവ ഡിസംബര് 8ന് വൈകിട്ട് ആറ് വരെ മാത്രമേ നടത്താവൂ.
ഉച്ചഭാഷിണി ഉപയോഗിക്കുമ്പോള്
ബന്ധപ്പെട്ട പോലീസ് അധികാരിയില് നിന്ന് ആവശ്യമായ അനുമതി രേഖാമൂലം വാങ്ങേണ്ടതാണ്. രാത്രി പത്ത്മണി മുതല് രാവിലെ ആറ് വരെ ഉച്ചഭാഷിണി ഉപയോഗിക്കാന് പാടില്ല.
വോട്ടര്മാര്ക്ക് സ്ലിപ്പ് നല്കുന്നത് സംബന്ധിച്ച്
രാഷ്ട്രീയ കക്ഷികള് വോട്ടര്മാര്ക്ക് നല്കുന്ന സ്ലിപ്പുകള് വെള്ളപേപ്പറില് തയ്യാറാക്കേണ്ടതും വോട്ടറുടെ പേര്, സീരിയല് നമ്പര്, പാര്ട്ട് നമ്പര്, പോളിംഗ് സ്റ്റേഷന്റെ പേര് എന്നീ വിവരങ്ങള് മാത്രം രേഖപ്പെടുത്തിയതുമാകണം. ഈ സ്ലിപ്പില് സ്ഥാനാര്ത്ഥിയുടെ പേരോ ചിഹ്നമോ ഫോട്ടോയോ പാടില്ല.
എസ്.എം.എസ്, സോഷ്യല് മീഡിയ വഴി തിരഞ്ഞെടുപ്പ് സന്ദേശങ്ങള്ക്ക് നിയന്ത്രണം
തിരഞ്ഞെടുപ്പ് നിയമങ്ങള്ക്കും നിലവിലുള്ള മറ്റ് നിയമങ്ങള്ക്കും വിരുദ്ധമായും ആര്ക്കെങ്കിലും അപകീര്ത്തികരമായ വിധത്തിലും എസ്.എം.എസ്, സോഷ്യല് മീഡിയ വഴി സന്ദേശങ്ങള് അയക്കുന്നത് കുറ്റകരമാണ്.
