ജാൻബീവിയുടെ ഭർത്താവിനായി തിരച്ചിൽ ഊർജിതം

കൊല്ലങ്കോട്:
കഴുത്തറത്ത്‌ കൊല്ലപ്പെട്ട മുതലമട ചെമ്മണാംപതി വടക്കേ കോളനിയിൽ ജാൻബീവിയുടെ മൃതദേഹം ചെമ്മണാംപതി ഖബർസ്ഥാനിൽ സംസ്‌കരിച്ചു.
പോസ്റ്റ്മോർട്ടത്തിനുശേഷം വീട്ടിലെത്തിച്ചാണ്‌ കബറടക്കിയത്‌. പെരുവെമ്പ്–- മന്ദത്തുകാവ് റോഡിൽ ചോറക്കോടിനു സമീപം ശനിയാഴ്ച രാവിലെയാണ് ജാൻബീവി(40)യെ കൊല്ലപ്പെട്ട നിലയിൽ കണ്ടത്.
ശരീരത്തിൽ നിരവധി വെട്ടേറ്റിട്ടുണ്ട്‌. കഴുത്ത് പാതി മുറിഞ്ഞ നിലയിലായിരുന്നു. ഭർത്താവായ അയ്യപ്പൻ എന്ന ബഷീറിനൊപ്പമായിരുന്നു ജാൻബീവിയുടെ താമസം.
വെള്ളി രാത്രി 8.30 ഓടെ കൊല്ലപ്പെട്ട ജാൻബീവി ഒരു പുരുഷനുമായി വഴക്കിട്ട് റോഡിലൂടെ നടന്നുപോകുന്നത് പ്രദേശവാസികൾ കണ്ടിരുന്നു.
പ്രതിയെന്ന്‌ സംശയിക്കുന്ന ഭർത്താവിനെ കണ്ടെത്താൻ മീനാക്ഷീപുരം, കൊഴിഞ്ഞാമ്പാറ പൊലീസ് ഇൻസ്പെക്ടർമാരുടെ നേതൃത്വത്തിൽ പ്രത്യേക അന്വേഷകസംഘം രൂപീകരിച്ച് അന്വേഷണം തുടങ്ങി.