മണ്ണാർക്കാട് സബ്ബ് ജയിലിന് അനുമതി. മുണ്ടേക്കരാട്ടെ കാഞ്ഞിരപ്പുഴ കെ പി ഐ പിയുടെ സ്ഥലം ജയിൽ വകുപ്പിന് കൈമാറി.
മണ്ണാർക്കാട് : മണ്ണാർക്കാട് മുണ്ടേക്കരാട് കാഞ്ഞിരപ്പുഴ ഇറിഗേഷൻ വകുപ്പിൻ്റെ സ്ഥലം ജയിൽ വകുപ്പിന് നൽകി ഉത്തരവിറങ്ങി. ഇതോടെ സബ്ബ് ജയിലിന് തടസമായി നിന്നിരുന്ന പ്രധാന പ്രശ്നം ഒഴിവായി. ഭൂമി റവന്യൂ വകുപ്പിൽ പുനർ നിക്ഷിപ്തമാക്കിയ ശേഷം മണ്ണാർക്കാട് സബ്ബ് ജയിൽ നിർമ്മാണത്തിനായി രണ്ട് സേവനവകുപ്പുകൾ ഭൂമി കൈമാറ്റ വ്യവസ്ഥകൾ പ്രകാരം ഉടമസ്ഥാവകാശം റവന്യു വകുപ്പിൽ നിർത്തി കൈവശാവകാശം ജയിൽ വകുപ്പിന് കൈമാറി നൽകുകയാണ് ചെയ്തിട്ടുള്ളത്.
2.86 ഹെക്ടർ ഭൂമിയാണ് ആഭ്യന്തര വകുപ്പ് ജയിൽ നിർമ്മാണത്തിനായി ശുപാർശ ചെയ്തിരുന്നത്. ഇതിൽ 1.6221 ഹെക്ടർ സ്ഥലമാണ് ആ റൊന്നിന് 1,97,600 രൂപ നിരക്കിൽ 3,20,52,696 രൂപ വില നിശ്ചയിച്ചാണ് ഭൂമി ജയിൽ വകുപ്പിന് കൈമാറിയിരിക്കുന്നത്.
ഭൂമി അനുവദിച്ച ആവശ്യത്തിന് മാത്രമേ ഉപയോഗിക്കാവു, പാട്ടത്തിന് നൽകാൻ പാടില്ല, ഭൂമിയിലെ മരങ്ങൾ റവന്യൂ അധികാരികൾ അറിയാതെ മുറിക്കാൻ പാടില്ല, ഒരു വർഷത്തിനകം നിർദിഷ്ട നിർമ്മാണ പ്രവർത്തനങ്ങൾ തുടങ്ങണം, കനാൽ വഴി സൗകര്യം തടസപ്പെടാത്ത രീതിയിൽ നിർമ്മാണ പ്രവൃത്തികൾ നടത്തണം തുടങ്ങിയ നിബന്ധനകളോടെയാണ് സ്ഥലം ജയിൽ വകുപ്പിന് കൈമാറിയിരിക്കുന്നത്.
