മുൻ പാലക്കാട് നഗരസഭ ചെയർമാനും പ്രമുഖ സഹകാരിയും ആയ ഏ രാമസ്വാമി യെ കേരള കോ-ഓപ്പറേറ്റീവ് ഡെപ്പോസിറ്റ് ഗ്യാരണ്ടി ബോർഡ് അംഗമായി സർക്കാർ നോമിനേറ്റ് ചെയ്തു. സംസ്ഥാന സഹകരണ വകുപ്പ് മന്ത്രി ശ്രീ വി എൻ വാസവൻ ആണ് ബോർഡ് ചെയർമാൻ. കാസർകോട് നീലേശ്വരം സ്വദേശിയായ പ്രമുഖ സഹകാരി കെ പി സതീഷ് ചന്ദ്രൻ ആണ് ബോർഡിൻറെ വൈസ് ചെയർമാൻ.
സംസ്ഥാന സഹകരണ യൂണിയൻ ചെയർമാൻ, സഹകരണ വകുപ്പ് സെക്രട്ടറി, സഹകരണ സംഘം രജിസ്ട്രാർ, സഹകരണ ഓഡിറ്റ് ഡയറക്ടർ, സഹകാരികൾ എന്നിവരുൾപ്പെടുന്ന 15 പേരാണ് ഭരണസമിതിയിൽ. സഹകരണ സംഘങ്ങളിലെ നിക്ഷേപങ്ങൾക്ക് സുരക്ഷിതത്വം ഉറപ്പാക്കുക എന്ന ലക്ഷ്യത്തോടെ സഹകരണ നിയമമനുസരിച്ച് 2018 ലാണ് ഇത്തരമൊരു പദ്ധതിക്ക് സർക്കാർ അംഗീകാരം നൽകിയത്.
പാലക്കാട് സർവീസ് സഹകരണ സംഘം ഡയറക്ടർ, പാലക്കാട് സർക്കിൾ സഹകരണ യൂണിയൻ ചെയർമാൻ, സംസ്ഥാന സഹകരണ പെൻഷൻ ബോർഡ് മെമ്പർ, പാലക്കാട് താലൂക്ക് ബിൽഡിങ് ആൻഡ് റോഡ് വർക്കേഴ്സ് സഹകരണസംഘം പ്രസിഡൻറ് എന്നീനിലകളിൽ അരനൂറ്റാണ്ട് കാലം സഹകരണമേഖലയിൽ പ്രവർത്തിച്ച അനുഭവ പരിചയം രാമസ്വാമിക്ക് ഉണ്ട്.
