കൊല്ലങ്കോട്: പൊങ്കലിനെ വരവേൽക്കാനൊരുങ്ങി അതിർത്തിയിലെ ഗ്രാമങ്ങൾ. തമിഴ് കുടുംബങ്ങളിൽ ജനുവരി 14 മുതൽ 17വരെയാണ് പൊങ്കൽ ആഘോഷം. മുതലമട, കൊല്ലങ്കോട്, പെരുമാട്ടി, വടകരപ്പതി, എരുത്തേമ്പതി, കൊഴിഞ്ഞാമ്പാറ തുടങ്ങിയ തമിഴ് കുടുംബങ്ങൾ കൂടുതലായി വസിക്കുന്ന പഞ്ചായത്തുകളിലാണ് വീടുകൾ, കാലിത്തൊഴുത്തുകൾ, കളപ്പുരകൾ എന്നിവ നവീകരിക്കൽ ആരംഭിച്ചിട്ടുള്ളത്. കാർഷികോത്സവമായ പൊങ്കൽ ദിനങ്ങളുടെ ഭാഗമായി വീടുകൾ, കളപ്പുരകൾ എന്നിവ മണ്ണ് ഉപയോഗിച്ച് മെഴുകി ഭംഗിയാക്കലും വീടുകളുടെ മുറ്റങ്ങളിൽ വർണശബളമായ കോലങ്ങൾ നിർമിച്ചാണ് തമിഴ് കുടുംബങ്ങൾ പൊങ്കൽദിനത്തെ വരവേൽക്കാൻ തയാറെടുക്കുന്നത്. കന്നുകാലികൾ ഉൾപ്പെടെ വളർത്തുമൃഗങ്ങൾക്കായും പൊങ്കലിന് പ്രത്യേകം ദിവസം ഉള്ളതിനാൽ കാലിത്തൊഴുത്തുകളുടെ അറ്റകുറ്റപ്പണികളും ശുചീകരണവും അതിർത്തിയിൽ തകൃതിയായി പുരോഗമിക്കുന്നുണ്ട്