അവകാശങ്ങള്‍ നേടിയെടുക്കുന്നതിനുവേണ്ടി ഗോവിന്ദാപുരം അബേദ്കര്‍ കോളനി ദളിത് സംരക്ഷണ സമിതി മുതലമട പഞ്ചായത്തുകാര്യാലയത്തിനു മുന്നില്‍ നടത്തിവരുന്ന അനിശ്ചിത കാല കുടില്‍ കെട്ടി സമരം പാര്‍ട്ടി ഏറ്റെടുത്തതായി കെപിസിസി പ്രസിഡന്‍റ് കെ.സുധാകരന്‍ പ്രഖ്യാപിച്ചു.
ഇന്നലെ സമരപന്തലില്‍ ഐക്യദാര്‍ഡ്യം പ്രഖ്യാപിക്കാനെത്തി സംസാരിക്കുകയായിരുന്നു. സമരം വിജയംനേടുന്നതു വരെ ഏതറ്റം വരേയും പോവുമെന്നും കെ.സുധാകരന്‍ മുന്നറിയിപ്പു നല്‍കി.
19ന് വീണ്ടും സമരപ്പന്തലിലെത്തുമെന്നും സമരത്തിലേര്‍പ്പെട്ടിരിക്കുന്ന വീട്ടമ്മമാരുള്‍പ്പെടെയുള്ളവര്‍ക്ക് ഉറപ്പു നല്‍കുകയും ചെയ്തു.
2014 മുതല്‍ ലൈഫ്മിഷന്‍ പദ്ധതിയില്‍ അപേക്ഷ നല്‍കി വരുന്നുണ്ടെങ്കിലും 34 കുടുംബങ്ങളെ ധനസഹായം നല്‍കാതെ ഒറ്റപ്പെടുത്തുന്നതായും വീട്ടമ്മമാര്‍ സങ്കടം പറഞ്ഞു.
ജില്ലാ പ്രസിഡന്‍റ് എ.തങ്കപ്പന്‍, സെക്രട്ടറി പി.മാധവന്‍, ഡിസിസി വൈസ് പ്രസിഡന്‍റ് സുമേഷ് അച്ചുതന്‍, മണ്ഡലം പ്രസിഡന്‍റ് മോഹനന്‍ എന്നിവരും കെ.സുധാകരനെ അനുഗമിച്ചെത്തിയിരുന്നു. സമരസമിതി ചെയര്‍മാന്‍ ശിവരാജ്, വി.പി.നിജാമുദീന്‍, മാരിമുത്തു എന്നിവര്‍ കെ.സുധാകരനെ സ്വീകരിച്ചു.
