സീറ്റി: ഭവദാസ് കെ.പി.സി.സി.ക്ക് പരാതി നൽകി
പാലക്കാട്: നാലുതവണയെന്ന മാനദണ്ഡത്തിൽ കുരുങ്ങി നഗരസഭയിലേക്കുള്ള കോൺഗ്രസ് സ്ഥാനാർത്ഥിപ്പട്ടികയിൽനിന്ന് പുറത്തായ കെ. ഭവദാസ് കെ.പി.സി.സി.ക്കും ജില്ലാ കോൺഗ്രസ് കമ്മിറ്റിക്കും പരാതി നൽകി. ഞായറാഴ്ചയ്ക്കകം തീരുമാനം വരുമെന്ന പ്രതീക്ഷയിലാണ് ഭവദാസിനെ അനുകൂലിക്കുന്നവർ. തിങ്കളാഴ്ചയാണ് പത്രിക പിൻവലിക്കാനുള്ള അവസാനദിവസം. നഗരസഭ 11-ാം വാർഡിൽ സ്വതന്ത്രസ്ഥാനാർത്ഥിയായാണ് ഭവദാസ് പത്രിക സമർപ്പിച്ചിട്ടുള്ളത്. ഇതിനൊപ്പം കുന്നത്തൂർമേട് സൗത്ത്, കുന്നത്തൂർമേട് നോർത്ത്, മുനിസിപ്പൽ ഓഫീസ് വാർഡുകളിലും പാർട്ടിപ്രവർത്തകർ സ്വതന്ത്രരായി പട്ടിക സമർപ്പിച്ചിട്ടുണ്ട്. ഏതാനും വാർഡുകളിലെ സ്ഥാനാർത്ഥിനിർണയത്തെച്ചൊല്ലി പ്രതിഷേധം വ്യാപകമാണെങ്കിലും മണ്ഡലം കമ്മിറ്റികൾ സമർപ്പിച്ച പട്ടികകൾ അംഗീകരിച്ചത് സ്ഥാനാർത്ഥിനിർണയത്തിനുള്ള കമ്മിറ്റിയാണെന്നാണ് നേതൃത്വം പറയുന്നത്.
