പാലക്കാട്: ഉത്തരേന്ത്യയിലെ അതി ശൈത്യത്തിലും അതിജീവനത്തിനായി പെരുതുന്ന കർഷകർക്ക് ഐക്യദാർഢ്യം അർപ്പിച്ചും പി.എസ്.സി.യേയും എംപ്ലോയ്മെൻ്റ് എക്സ്ചേഞ്ചിനെയും നോക്കുകുത്തിയാക്കി ബന്ധുക്കൾക്കും പാർട്ടിക്കാർക്കും പിൻ വാതിലിലൂടെ ജോലി നൽകുന്ന സംസ്ഥാന സർക്കാരിൻ്റെ അഴിഞാട്ടത്തിനുമെതിരെ യൂത്ത് കോൺഗ്രസ് ജില്ലാ പ്രസിഡൻ്റ് ടി.എച്ച്. ഫിറോസ് ബാബുവിൻ്റെ നേതൃത്വത്തിൽ ‘ഹം ചലേ ‘ എന്ന പേരിൽ പദയാത്ര നടത്തുകയാണ്. 2021 ഫെബ്രുവരി 10, 11, 12, 13 ദിവസങ്ങളിലായി കൂറ്റനാട് മുതൽ പാലക്കാട് വരെ 81 കിലോമീറ്റർ പദയാത്ര സഞ്ചരിക്കും. ഫെബ്രുവരി 10-ന്
ഉച്ചകഴിഞ്ഞ് 2.30-ന്
കൂറ്റനാട് നിന്നു തുടങ്ങുന്ന പദയാത്ര യൂത്ത് കോൺഗ്രസ് സംസ്ഥാന പ്രസിഡൻ്റ് ഷാഫി പറമ്പിൽ എം.എൽ.എ. ഉദ്ഘാടനം ചെയ്യും. വി.ടി.ബൽറാം എം.എൽ.എ. ഫ്ലാഗ് ഓഫ് നിർവഹിക്കും. ആദ്യ ദിവസം കാൽനടയായി പട്ടാമ്പിയിലെത്തുന്ന സ്ഥിരാംഗങ്ങൾ അവിടെ താമസിക്കും. രണ്ടാം ദിവസം ഒറ്റപ്പാലത്തും മൂന്നാം ദിവസം പറളിയിലും താമസിക്കുന്ന പദയാത്രികർ നാലാം ദിവസം വീടുകളിലേക്ക് മടങ്ങും. പദയാത്രയ്ക്ക് വിവിധ സ്ഥലങ്ങളിൽ നൽകുന്ന സ്വീകരണത്തിൽ എംപിമാർ/ എംഎൽഎമാർ / യൂത്ത് കോൺഗ്രസ് അഖിലേന്ത്യ, സംസ്ഥാന നേതാക്കൾ, കെപിസിസി ഭാരവാഹികൾ എന്നിവർ പങ്കെടുക്കും. ജില്ലയിലെ
ഒരു നിയമസഭ മണ്ഡലത്തിൽ നിന്നും 10 സ്ഥിരാംഗങ്ങൾ വീതം ഉൾപ്പെടെ 120 പേർ പദയാത്രയുടെ സ്ഥിരാംഗങ്ങളായിരിക്കും. പൂർണ്ണമായും കോവിഡ് പ്രോട്ടോക്കോൾ പാലിച്ചാണ് പദയാത്ര സംഘടിപ്പിച്ചിട്ടുള്ളത്. ഓരോ സ്വീകരണത്തിലും പി.എസ്.സി.യുമായി ബന്ധപ്പെട്ട് ഉൾപ്പെടെയുള്ള യുവജനങ്ങളുടെ പരാതി കേൾക്കുകയും നിവേദനങ്ങൾ സ്വീകരിക്കുകയും ചെയ്യും.
പദയാത്രയോടനുബന്ധിച്ച്
ഫെബ്രുവരി 16-ന് വൈകീട്ട് നാലിന് പാലക്കാട് ടൗണിൽ യുവജന റാലിയും തുടർന്ന് കോട്ടമൈതാനത്ത് പൊതു സമ്മേളനവും നടത്തും. പൊതു സമ്മേളനം മുൻ മുഖ്യമന്ത്രിയും എ.ഐ.സി.സി.ജനറൽ സെക്രട്ടറിയുമായ ഉമ്മൻ ചാണ്ടി ഉദ്ഘാടനം ചെയ്യും.
പത്ര സമ്മേളനത്തിൽ ജില്ലാ പ്രസിഡൻ്റ് ടി.എച്ച്.ഫിറോസ് ബാബു, സംസ്ഥാന ജനറൽ സെക്രട്ടറി കെ.എം.ഫെബിൻ, സംസ്ഥാന സെക്രട്ടറിമാരായ സജേഷ് ചന്ദ്രൻ, എ.കെ.ഷാനിബ്, ജില്ലാ ജനറൽ സെക്രട്ടറി വിനോദ് ചെറാട്, ഷാലി പൊയിലൂർ എന്നിവർ പങ്കെടുത്തു.
