‘ലഹരി മുക്ത വാർഡിനായ് കൈകോർക്കുക’
സ്വാതന്ത്ര്യ ദിനത്തോടനുബന്ധിച്ച് 32-ാം വാർഡ് ജാഗ്രതാ സമിതിയുടെ ആഭിമുഖ്യത്തിൽ സംഘടിപ്പിച്ച ലഹരി വിരുദ്ധ പദയാത്ര സർക്കിൾ ഇൻസ്പെക്ടർ ഷിജു എബ്രഹാം സാർ ഉദ്ഘാടനം നിർവ്വഹിച്ചു.
വളർന്നു വരുന്ന തലമുറയെ ലഹരിയെന്ന മഹാവിപത്തിൽ നിന്നും രക്ഷിച്ചെടുക്കാൻ എല്ലാവരും ഒറ്റക്കെട്ടായി രംഗത്തിറങ്ങണമെന്നും ജാഗ്രതാ സമിതിയുടെ ബോധവൽക്കരണ പ്രവർത്തനങ്ങൾക്ക് എല്ലാവിധ പിന്തുണയുമുണ്ടാകുമെന്നും അദ്ദേഹം പറഞ്ഞു.
ജാഗ്രതാ സമിതി രക്ഷാധികാരിയും വാർഡ് കൗൺസിലറുമായ എം.സുലൈമാൻ, ചെയർമാൻ മുഹമ്മദ് റാഫി, വൈസ് ചെയർമാൻ എം.കാജാ ഹുസൈൻ, കൺവീനർ ഫൈസൽ ബാബു തുടങ്ങിയവർ നേതൃത്വം നൽകി.
പുതുപ്പള്ളിത്തെരുവ് ജംഗ്ഷനിൽ നിന്നുമാരംഭിച്ച പദയാത്ര
വെണ്ണക്കര, ഭാരത് നഗർ, ചടനാംകുർശ്ശി തോട്ടുപാലം, കെരീംനഗർ തുടങ്ങിയ പ്രദേശങ്ങളിലൂടെ സഞ്ചരിച്ച് പൂളക്കാട് ജംഗ്ഷനിൽ സമാപിച്ചു.
മുദ്രാവാക്യം വിളിച്ച് പ്ലക്കാർഡേന്തി ചിട്ടയാർന്ന രീതിയിൽ നടന്ന പദയാത്രയിൽ കോവിഡ് പ്രോട്ടോക്കോൾ പാലിച്ച് നിരവധി ചെറുപ്പക്കാരാണ് പങ്കെടുത്തത്.
ഒപ്പം ലഹരിക്കെതിരെ ബോധവൽക്കരണ സന്ദേശമടങ്ങിയ ലഘുലേഖയുടെ വിതരണവും നടന്നു.