വിദ്യാര്‍ഥിനിയുടെ മരണം അന്വേഷണം കാര്യക്ഷമമാക്കണമെന്ന് കുടുംബം,
പോസ്റ്റ് മോര്‍ട്ട് റിപ്പോര്‍ട്ട് പോലും നല്‍കിയില്ലെന്ന്
മണ്ണാര്‍ക്കാട്: ഒരു മാസം മുമ്പ് സ്കൂള്‍ വിദ്യാര്‍ഥിനിയെ വീട്ടിനുള്ളില്‍ മരിച്ച നിലയില്‍ കണ്ടെത്തിയ സംഭവത്തില്‍ അന്വേഷണം കാര്യക്ഷമമാക്കണമെന്ന് രക്ഷിതാക്കളും, പഞ്ചായത്ത് അംഗവും വാര്‍ത്ത സമ്മേളനത്തില്‍ ആവശ്യപ്പെട്ടു. കഴിഞ്ഞ മാസം 28 നാണ് കുമരംപുത്തൂര്‍ പള്ളിക്കുന്ന് മുസ്ലിയാരകത്ത് അഹമ്മദ് ബാബുവിന്‍റെയും ജന്‍സീറയുടെയും മകളായ റിന്‍ഷ ഷെറിനെ വീട്ടിനുള്ളില്‍ തൂങ്ങി മരിച്ച നിലയില്‍ കണ്ടെത്തിയത്. പത്താം ക്ലാസ് വിദ്യാര്‍ഥിനിയായിരുന്നു.
സംഭവത്തില്‍ മണ്ണാര്‍ക്കാട് പൊലീസ് കേസെടുത്തെങ്കിലും അന്വേഷണം മന്ദഗതിയിലാണെന്നാണ് രക്ഷിതാക്കളുടെ ആരോപണം. സമീപ വാസിയായ യുവാവുമായി അടുപ്പത്തിലായിരുന്നു. റിന്‍ഷയുടെ വിവാഹം ഇരു വീട്ടുകാരും 18 വയസ്സ് പൂര്‍ത്തിയാകുമ്പോള്‍ നടത്താമെന്ന് കരാറുണ്ടായിരുന്നതായും എന്നാല്‍ പിന്നീട് കുട്ടിയെ യുവാവ് മാനസികമായി പീഡിപ്പിച്ചതിനെ തുടര്‍ന്നുള്ള പ്രശ്നങ്ങളാണ് കുട്ടിയുടെ മരണത്തിന് കാരണമായതെന്നുമാണ് രക്ഷിതാക്കള്‍ പറയുന്നത്. സംഭവത്തില്‍ പൊലീസിന്‍റെ ഭാഗത്തു നിന്നും കാര്യക്ഷമമായ അന്വേഷണം നടക്കുന്നില്ലെന്നും,ഇത് സംബന്ധിച്ച് വ്യക്തമായ പരാതി പാലക്കാട് പൊലീസ് സൂപ്രണ്ടിന് നല്‍കിയിട്ടും അന്വേഷണം മന്ദഗതിയിലാണെന്നും, കുട്ടിയുടെ പോസ്റ്റ് മോര്‍ട്ടം റിപ്പോര്‍ട്ടിന്‍റെ കോപ്പി പോലും നല്‍കിയീട്ടില്ലെന്നും രക്ഷിതാക്കള്‍ പറഞ്ഞു.
വാര്‍ത്താ സമ്മേളനത്തില്‍ റിന്‍ഷാ ഷെറിന്‍റെ പിതാവ് അഹമ്മദ് ബാബു, മാതാവ് ജന്‍സീറ, പഞ്ചായത്ത് അംഗം റസീന വറോടന്‍ എന്നിവര്‍ വാര്‍ത്ത സമ്മേളനത്തില്‍ പങ്കെടുത്തു.
