ഒന്നര കിലോയോളം കഞ്ചാവുമായി വല്ലപ്പുഴയില്‍നിന്ന് ഒരാള്‍ പിടിയില്‍. വല്ലപ്പുഴ ചാക്കിരിപറമ്ബത്ത് ഗിരീഷ്ബാബു (40)വിനെയാണ് ബുധനാഴ്ച പട്ടാമ്ബി പൊലീസ് അറസ്റ്റ് ചെയ്തത്.
ലഹരി മാഫിയ സംഘങ്ങള്‍ക്കെതിരെ ഓപറേഷൻ ഡി-ഹണ്ട് എന്ന പേരില്‍ സംസ്ഥാന വ്യാപകമായി നടത്തുന്ന നടപടികളുടെ ഭാഗമായി ജില്ല പൊലീസ് മേധാവി ആർ. ആനന്ദിന്റെ നിർദേശ പ്രകാരം പട്ടാമ്ബി മേഖലയില്‍ നടത്തിയ പ്രത്യേക പരിശോധനയിലാണ് പ്രതി പിടിയിലായത്.
പിടിച്ചെടുത്ത കഞ്ചാവിന് വിപണിയില്‍ ലക്ഷങ്ങള്‍ വിലവരും.
പ്രതി അടിപിടി, കഞ്ചാവ് കടത്ത് തുടങ്ങിയ അര ഡസനോളം കേസുകളിലെ പ്രതിയാണ്. പ്രതിക്കെതിരെ കാപ്പ ഉള്‍പ്പെടെ കർശന നടപടികള്‍ സ്വീകരിക്കാൻ നടപടികള്‍ സ്വീകരിക്കുന്നതായി പൊലീസ് അറിയിച്ചു.
