മലമ്പുഴ: ഫിലമെൻറ് രഹിത കേരളം പദ്ധതിയുടെ ഭാഗമായുള്ള എൽ ഇ ഡി ബൾബുളുടെ മലമ്പുഴ സെക്ഷൻ തല വിതരണം ആരംഭിച്ചു.
കാര്യക്ഷമമായ ഊർജ്ജ ഉപയോഗത്തിലൂടെ ഊർജ്ജ ലഭ്യത ഉറപ്പാക്കുന്നതിനുള്ള കേരള സർക്കാരിന്റെ കർമ്മ പദ്ധതിയാണ് ഫിലമെന്റ് രഹിത കേരളം പദ്ധതി. ഇതിൻ്റെ ഭാഗമായി കേരളത്തിലെ എല്ലാ വീടുകളിലെയും സി എഫ് എൽ, ഫിലമെന്റ് ബൾബുകൾ എന്നിവയ്ക്ക് പകരം ഊർജ്ജക്ഷമവും പരിസ്ഥിതി സൗഹൃദവുമായ എൽ ഇ ഡി ബൾബുകൾ നല്കുന്ന ബൃഹദ് പദ്ധതിയാണ് ഇത്. ഇത് പ്രകാരം റജിസ്ത്രർ ചെയ്തവർക്ക് എൽ ഇ ഡി ബൾബുകൾ വീടുകളിൽ എത്തിക്കും. ഒരു എൽ ഇ ഡി ബൾബിന് സൗജന്യ നിരക്കായ 65 രൂപയാണ് ഈടാക്കുന്നത്. ഇതിന് മൂന്നു വർഷവാറൻ്റിയുണ്ട്. ഉപഭോക്താക്കൾക്ക് നൽകുന്ന എൽ ഇ ഡി ബൾബുകളുടെ തുക ഒരുമിച്ചോ പരമാവധി 6 പലിശ രഹിത തവണകളായോ, നേരിട്ടോ ഓൺലൈൻ ആയോ അടയ്ക്കാവുന്നതാണ്. ഉപഭോക്താവ് അയാളുടെ വീട്ടിൽ ഉപയോഗിച്ച ബൾബുകൾ, സി എഫ് എൽ എന്നിവ ജീവനക്കാർ വശം തിരികെ നൽകവുന്നതാണ്. ഇതുവരെ റജിസ്ട്രർ ചെയ്യാത്തവർക്ക് ഇനിയും റജിസ്ടർ ചെയ്യാൻ അവസരമുണ്ട്. മലമ്പുഴ സെക്ഷനിൽ 709 അപേക്ഷകർക്കായി 5981 എണ്ണം ബൾബുകൾ ആണ് വിതരണം ചെയ്യുന്നത്. കെ എസ് ഇ ബിയും എനർജി മാനേജ്മെന്റ് സെന്ററും സംയുക്തമായാണ് ഈ പദ്ധതി നടപ്പാക്കുന്നത്. മലമ്പുഴ സെക്ഷൻ തല ഉദ്ഘാടനം ഗ്രാമപഞ്ചായത്ത് പ്രസിഡൻ്റ് കുമാരി രാധിക മാധവൻ അംഗനവാടി ടീച്ചർമാരായ ഓമന.കെ.ആർ, വിചിത്ര. എ എന്നിർക്ക് നൽകി നിർവവഹിച്ചു. സെക്ഷൻ ഓഫീസ് പരിസരത്ത് നടന്നചടങ്ങിൽ കൽപ്പാത്തി സബ്ബ് ഡിവിഷൻ അസിസ്റ്റൻറ് എക്സിക്യുട്ടിവ് എൻഞ്ചിനീയർ കെ.എച്ച്.ഗീത അദ്ധ്യക്ഷത വഹിച്ചു. അസിസ്റ്റൻ്റ് എൻഞ്ചിനീയർ കെ.പരമേശ്വരൻ മുഖ്യ പ്രഭാഷണം നടത്തി. സീനിയർ സൂപ്രണ്ട് സുജാത നാരായൺ, രാജേഷ് പി.എൻ, സുനിൽ കുമാർ പി.വി, സുധീഷ് പി, മണി കുളങ്ങര എന്നിവർ സംസാരിച്ചു.
