അടിപ്പെരണ്ട കൽച്ചാടി ആദിവാസി കോളനിയിലെ യുവതിക്ക് ആംബുലൻസിൽസുഖ പ്രസവം

നെന്മാറ :സാമൂഹിക ആരോഗ്യകേന്ദ്രത്തിലെ ആംബുലൻസിൽ ആദിവാസി യുവതിയുടെ സുഖപ്രസവം. അടിപ്പെരണ്ട കൽച്ചാടി ആദിവാസി കോളനിയിലെ ഷിജുവിന്റെ ഭാര്യ സ്നേഹലതയാണു പെൺകുഞ്ഞിനു ജന്മം നൽകിയത്. കോളനിയിൽ നിന്നു ലഭിച്ച വിവരത്തെ തുടർന്നു നെന്മാറ പൊലീസ് ആംബുലൻസ് ഏർപ്പെടുത്തിയിരുന്നു. എന്നാൽ കോളനിയിലേക്കുള്ള ദുർഘട പാതയിലൂടെ ആംബുലൻസിനു വേഗത്തിൽ എത്താൻ കഴിഞ്ഞില്ലെന്നു ഡ്രൈവർ പുഷ്പരാജൻ പറഞ്ഞു. കുറച്ചകലെ നിർത്തിയ ആംബുലൻസിലേക്കു കോളനിയിലുള്ളവർ ഗർഭിണിയെ തോളിലേറ്റി എത്തിക്കുകയായിരുന്നു. ആശുപത്രിയിലേക്കു പുറപ്പെട്ടെങ്കിലും എത്തുന്നതിന് ഒരു കിലോമീറ്റർ മുൻപ് ആംബുലൻസിൽത്തന്നെ പ്രസവിച്ചു. തുടർന്ന് ആശുപത്രിയിൽ എത്തിയതോടെ ഡോ. ജോബിൻ ജോസ്, ഡോ. ജോർജുകുട്ടി, ഹെഡ് നഴ്സ് മിനി, ഫൗസിയ, മോനിഷ, ഭാനുമതി, സുജാത എന്നിവരുടെ നേതൃത്വത്തിൽ പരിചരണം നൽകി. ആശുപത്രിയിൽ ഗൈനക്കോളജിസ്റ്റ് ഇല്ല.