യുവാവ് പുഴയിൽ അകപ്പെട്ടു; കണ്ടെത്താനായുള്ള തിരച്ചില്‍ തുടരുന്നു
മണ്ണാര്‍ക്കാട്: മുഹമ്മദ് താഹിർ കെ. പി എന്ന യുവാവ് കുന്തിപുഴയിൽ അകപ്പെട്ടതായി ലഭിച്ച വിവരത്തിന്റെ അടിസ്ഥാനത്തില്‍ ഫയര്‍ഫോഴ്‌സ് തിരച്ചില്‍ നടത്തുന്നു. കാരാട്ടുപറമ്പിൽ ഷംസുവിൻ്റെ മകൻ താഹിറിനെയാണ് കാണാതായിരിക്കുന്നത്.
വസ്ത്രങ്ങളും ചെരിപ്പുമെല്ലാം കുളിക്കടവിൽ അഴിച്ചു വെച്ചിട്ടുണ്ട്. മണിക്കൂറുകൾക്ക് ശേഷവും വസ്ത്രങ്ങളും ചെരിപ്പും എടുത്തുകൊണ്ടു പോവാത്തതിൽ സംശയം തോന്നിയാണ് നാട്ടുക്കാർ ബന്ധുക്കളെ വിവരമറിയിച്ചതും തെരച്ചിൽ ആരംഭിച്ചതും. തുടർന്ന് അഗ്നിശമനസേനയും സിവിൽ ഡിഫൻസും തെരച്ചിൽ നടത്തി.
വൈകുന്നേരം ഏഴ് മണി വരേയും തെരച്ചിൽ നടത്തിയെങ്കിലും കണ്ടെത്തിയിട്ടില്ല. പുഴയിൽ അകപ്പെട്ടതാണോ മറ്റെന്തെങ്കിലും സംഭവിച്ചിട്ടുണ്ടോയെന്ന് വ്യക്തമായിട്ടില്ലെന്ന് പോലീസ് അറിയിച്ചു.
