കിണർ വൃത്തിയാക്കുന്നതിനിടെ മണ്ണു വീണ് അതിഥിത്തൊഴിലാളി മരിച്ചു
മണ്ണാർക്കാട്.അഗളി അട്ടപ്പാടിയിൽ കിണർ വൃത്തിയാക്കുന്നതിനിടെ മണ്ണിടിഞ്ഞുവീണ് അതിഥിത്തൊഴിലാളി മരിച്ചു. ജാർഖണ്ഡ് സ്വദേശി സുധാമ്മ മഹ്ട്ടോ (23) ആണു മരിച്ചത്. അഗളി ജെല്ലിപ്പാറക്കടുത്ത് ഒമ്മല കാറ്റുമുക്കിൽ ഇന്നലെ ഉച്ചയ്ക്കാണു സംഭവം. സ്വകാര്യ വ്യക്തിയുടെ കിണറിൽ റിങ് ഇറക്കുന്നതിനിടെ ഇടിഞ്ഞുവീണ മണ്ണും ചെളിയും നീക്കം ചെയ്യുകയായിരുന്നു യുവാവ്. ഇതിനിടെ വശങ്ങളിൽനിന്നു കൂടുതൽ മണ്ണും വലിയ പാറയും ദേഹത്തേക്ക് ഇടിഞ്ഞു വീണു. അഗളിയിൽനിന്നു പൊലീസും മണ്ണാർക്കാടുനിന്ന് അഗ്നിരക്ഷാ സേനയും എത്തി നാട്ടുകാരുടെ സഹായത്തോടെ രക്ഷാപ്രവർത്തനം നടത്തിയെങ്കിലും രക്ഷിക്കാനായില്ല.
ഉച്ചയ്ക്കു പന്ത്രണ്ടരയോടെ അപകടമുണ്ടായെങ്കിലും രക്ഷാപ്രവർത്തനം ആരംഭിക്കാൻ വൈകി. വാഹനം വഴിയിൽ കുടുങ്ങിയതിനാൽ മണ്ണാർക്കാടുനിന്നുള്ള അഗ്നിരക്ഷാ സേന വൈകി. മണ്ണുമാന്തി യന്ത്രം ഉപയോഗിച്ചു പാറ നീക്കി വൈകിട്ട് അഞ്ചരയോടെയാണു മൃതദേഹം പുറത്തെടുത്തത്. അഗളി സിഐ പി. മഞ്ജിത്ലാൽ, മണ്ണാർക്കാട് ഫയർ സ്റ്റേഷൻ ഓഫിസർ പി.ടി. ഉമ്മർ, അസി. ഓഫിസർ പി. നാസർ എന്നിവർ രക്ഷാപ്രവർത്തനത്തിനു നേതൃത്വം നൽകി. എൻ. ഷംസുദ്ദീൻ എംഎൽഎ സ്ഥലത്തെത്തി.
