കാർ തടഞ്ഞ് പണം കവർച്ച ചെയ്യുന്ന സംഘo പിടിയിൽ

പാലക്കാട്: ദേശീയ പാതയിൽ കാർ തടഞ്ഞ് പണം കവർച്ച ചെയ്യുന്ന സംഘത്തിലെ മൂന്ന് പ്രതികൾ കൂടി കസബ പൊലീസിന്റെ പിടിയിൽ. കഴിഞ്ഞ ഡിസംബർ 15നാണ് കേസിനാസ്പദമായ സംഭവം നടന്നത്. ദേശീയ പാതയിൽ പുതുശ്ശേരി ഫ്‌ളൈ ഓവറിൽ ടിപ്പറും കാറുകളും ഉപയോഗിച്ച് കാർ തടഞ്ഞുനിർത്തി ഡ്രൈവറേയും കൂട്ടാളിയേയും ആക്രമിച്ച് കാറും പണവും തട്ടിയെടുക്കുകയും ശേഷം പ്രതികൾ കാർ ഒറ്റപ്പാലത്ത് ഉപേക്ഷിച്ചും പോകുകയായിരുന്നു. സംഘത്തിലെ പ്രധാന കണ്ണിയും കവർച്ച നടത്തിയ ശേഷം ഒളിവിൽപോയ കന്നിമാരി ചെറിയ കല്യാണപേട്ട വീട്ടിൽ അബിജിത് (24), പോത്തനായിക്കാൻ ചള്ള വീട്ടിൽ അർജ്ജുൻ സുരേഷ് (25), ചിറ്റൂർ ഏന്തൽപാലം വീട്ടിൽ അജിത്ത് (27) എന്നിവരെയാണ് കസബ പൊലീസ് പിടികൂടിയത്.
സി.സി ടിവികൾ നിരീക്ഷിച്ചും മൊബൈൽ ഫോൺ ടവർ ലൊക്കേഷനും കേന്ദ്രീകരിച്ച് നടത്തിയ അന്വേഷണത്തിനൊടുവിലാണ് ഈ കേസിലെ എല്ലാ പ്രതികളേയും തിരിച്ചറിഞ്ഞത്. ജില്ലാ പൊലീസ് മേധാവി ആർ.വിശ്വനാഥിന്റെ നിർദ്ദേശപ്രകാരം പാലക്കാട് ഡിവൈ.എസ്.പി പി.സി.ഹരിദാസിന്റെ നേതൃത്വത്തിൽ ഇൻസ്‌പെക്ടർമാരായ
എൻ.എസ്.രാജീവ്, എ.ദീപകുമാർ, ഇ.ആർ.ബൈജു, ഹരീഷ് ,അനീഷ്, രംഗനാഥൻ, ഷാഹുൽ ഹമീദ്, എന്നിവരടങ്ങുന്ന സംഘമാണ് കേസ് അന്വേഷിക്കുന്നത്.