പാലക്കാട് നഗരസഭ മൂന്നും നാലും വാർഡുകളിൽ നായശല്യം നിയന്ത്രണാതീതം; ശങ്കുവാരത്തോട്–ശങ്കുവാരമേട് പ്രദേശം ഭീതിയിൽ മുങ്ങുന്നു
പാലക്കാട്: നഗരസഭയുടെ 3-ാം വാർഡും 4-ാം വാർഡും ഉൾപ്പെടുന്ന ശങ്കുവാരത്തോട്, ശങ്കുവാരമേട് പ്രദേശങ്ങളിൽ തെരുവുനായ ശല്യം അസഹനീയമായി ഉയർന്നതോടെ നാട്ടുകാർ ഭീതിയിലും ആശങ്കയിലും കഴിയുന്നു. രാവും പകലും കൂട്ടമായി തെരുവുകളിൽ പായുന്ന നായകൾ കാരണം കുട്ടികൾക്കും സ്ത്രീകൾക്കും മുതിർന്നവർക്കും സുരക്ഷിതമായി പുറത്തിറങ്ങാൻ പോലും കഴിയാത്ത അവസ്ഥയാണെന്ന് പ്രദേശവാസികൾ പറയുന്നു.
പ്രദേശവാസികളുടെ ആരോപണമനുസരിച്ച്, ചില വീട്ടുകാരുടെ നിയന്ത്രണമില്ലാത്ത നായ വളർത്തലും അവരെ പൊതുവഴികളിലേക്ക് അഴിച്ചുവിടുന്നതും പ്രശ്നം രൂക്ഷമാക്കിയിരിക്കുകയാണ്. തെരുവുകളും വീട്ടുമുറ്റങ്ങളും കുട്ടികളുടെ സ്കൂൾ–മദ്രസ യാത്രാമാർഗവും എല്ലാം നായകളുടെ താവളങ്ങളായി മാറിയിരിക്കുകയാണ്.
“കുട്ടികളെ പുറത്തേക്ക് അയക്കാൻ പേടിയാണ്” – രക്ഷിതാക്കൾ
മാസങ്ങൾക്കിടെ രണ്ട് പേർക്ക് നായ കടിച്ച സംഭവങ്ങൾ റിപ്പോർട്ട് ചെയ്തിട്ടുണ്ടെന്നാണ് നാട്ടുകാർ പറയുന്നത്.
“രാവിലെ തന്നെ നായകൾ കൂട്ടമായി പായും. കുട്ടികളെ വിട്ടേക്കാൻ കഴിയുന്നില്ല. വയോധികർക്ക് പോലും പുറത്തിറങ്ങാൻ പേടിയാണ്” – ഇതാണ് നാട്ടുകാരുടെ നിലവിളി.
കൗൺസിലർമാർ ഇടപെടുന്നില്ലെന്ന ശക്തമായ പരാതി
“വാർഡ് കൗൺസിലർമാരെ നിരവധി തവണ അറിയിച്ചിട്ടും ഫലപ്രദമായ നടപടി ഒന്നും കണ്ടില്ല. ഉദ്യോഗസ്ഥർ വരും, ചോദിക്കും… പിന്നാലെ കാര്യങ്ങൾ പഴയപടിയാകും,” എന്നും നാട്ടുകാർ ആരോപിക്കുന്നു.
നൂറടി റോഡും ശങ്കുവാരത്തോട് പ്രദേശങ്ങളും ‘ഭീതിക്കുവഴികൾ’
വിക്ടോറിയ കോളേജിന് സമീപം ചിൻമയ ജങ്ഷൻ മുതൽ മാട്ടുമന്തവരെ നൂറടി റോഡ് പ്രദേശവും നായകളുടെ പിടിയിലാണ്.
റോഡിന് വശത്തുള്ള ഒഴിഞ്ഞ പറമ്പുകൾ കൂട്ടനായകളുടെ താവളമായി മാറിയതോടെ, പ്രഭാതസവാരി പോലും ഉപേക്ഷിക്കാൻ ആളുകൾ നിർബന്ധിതരായി.
“ഒറ്റയ്ക്കുള്ള യാത്ര അസാധ്യമായി. ചായക്കടകൾ മുന്നിലും പൊതു ഇടങ്ങളിലും നായകൾ പിന്തുടരും.
രാത്രികാല യാത്ര? സാധ്യമല്ല,” – നാട്ടുകാർ പറയുന്നു.
ജീവിതം തന്നെ അസഹനീയമാകുന്ന അവസ്ഥ
“ഇത്രയും പേടിച്ച് ജീവിക്കേണ്ട സാഹചര്യം ഒരിക്കലും ഉണ്ടായിട്ടില്ല”,
“കൂട്ടമായി പായുന്ന നായകൾ കാരണം വാഹനയാത്ര പോലും അപകടം”,
എന്നിങ്ങനെ നാട്ടുകാരുടെ പ്രതികരണങ്ങൾ പൊതുസുരക്ഷയുടെ അപകടമൂല്യം വ്യക്തമാക്കുന്നു.
പദ്ധതികൾ പ്രഖ്യാപിച്ചിട്ടും നടപ്പിലാകാതെ
നായശല്യം കുറയ്ക്കാൻ നഗരസഭ അവതരിപ്പിച്ചിരുന്ന യൂസർ-ഫീ അടിസ്ഥാനത്തിലുള്ള നായ ഷെൽട്ടർ പദ്ധതി,
– ചികിത്സയും ഭക്ഷണവും നഗരസഭ വഹിക്കുന്ന തരത്തിൽ തയ്യാറാക്കിയതായിരുന്നു.
ജില്ലാ പ്ലാനിങ് ബോർഡ് അംഗീകാരം നൽകിയിട്ടും, ജില്ലാ ഇന്നൊവേറ്റീവ് കമ്മിറ്റിയുടെ അനുമതി ലഭിക്കാത്തതിനെ തുടർന്ന് പദ്ധതി തള്ളിക്കളയപ്പെട്ടതായി നഗരസഭ അധികൃതർ പറയുന്നു.
അടിയന്തര നടപടി ആവശ്യപ്പെടുന്നു
തെരുവുനായ പിടികൂടൽ, വാക്സിനേഷൻ, ശുചിത്വം, കൺട്രോൾ ഡ്രൈവ് എന്നിവ ജില്ലാതലത്തിൽ അടിയന്തരമായി ആരംഭിക്കണമെന്നും,
മൂന്നും നാലും വാർഡുകളിലെ ശങ്കുവാരത്തോട്–ശങ്കുവാരമേട് പ്രദേശങ്ങളിൽ പൊതുസുരക്ഷ ഉറപ്പാക്കാൻ നഗരസഭ ഉടൻ രംഗത്തിറങ്ങണമെന്നും നാട്ടുകാർ ആവശ്യമുന്നയിക്കുന്നു.
