ശെൽവപാളയത്ത് യുഡിഎഫ് വിമതനായി മുകേഷ് കുമാർ
പാലക്കാട് : പാലക്കാട് നഗരസഭ 23-ാം വാർഡ് ശെൽവപാളയത്ത് സ്വതന്ത്രനായി നഗരസഭ മുൻ സ്ഥിരംസമിതി അധ്യക്ഷനും പ്രാദേശിക കോൺഗ്രസ് നേതാവുമായ എം.കെ. മുകേഷ് കുമാർ മത്സരിക്കും. നിലവിൽ യുഡിഎഫ് വാർഡിൽ നിശ്ചയിച്ച സ്ഥാനാർഥിയെ അംഗീകരിക്കാനാവാത്തതാണ് മത്സരിക്കാൻ പ്രേരിപ്പിച്ചതെന്ന് മുകേഷ് പറഞ്ഞു. 45 വർഷമായി കോൺഗ്രസിൽ പ്രവർത്തിക്കുന്ന തന്നെ സ്ഥാനാർഥിയാക്കുമെന്ന പ്രതീക്ഷയിലാണ് പത്രിക നൽകിയത്. ഞായറാഴ്ച അർധരാത്രിവരെ ചർച്ചകൾ തുടർന്നെങ്കിലും കോൺഗ്രസ് നേതൃത്വം നിലപാട് മാറ്റിയെന്നും മുകേഷ് കുമാർ ആരോപിച്ചു. 2000 മുതൽ 2010 വരെ പാലക്കാട് നഗരസഭയിലെ കോൺഗ്രസ് അംഗമായിരുന്നു. പാലക്കാട് ബ്ലോക്ക് കോൺഗ്രസ് ജനറൽ സെക്രട്ടറി, വൈസ് പ്രസിഡന്റ് തുടങ്ങിയ സ്ഥാനങ്ങൾ വഹിച്ചിട്ടുണ്ട്.
