വെയിലിന് കാഠിന്യം കൂടുന്നു; ജാഗ്രത പാലിക്കണമെന്ന് ആരോഗ്യവകുപ്പ്
കേന്ദ്ര കാലാവസ്ഥാ വകുപ്പിന്റെ ഔദ്യോഗിക കണക്ക് പ്രകാരം രാജ്യത്തെ ഉയര്ന്ന ചൂട് കഴിഞ്ഞ ദിവസം പാലക്കാട് ജില്ലയില് രേഖപെടുത്തിയ സാഹചര്യത്തില് സൂര്യാഘാതം, സൂര്യതപം എന്നിവ മൂലമുള്ള പൊള്ളലുകള് വരാന് സാധ്യതയുണ്ടെന്നും ജനങ്ങള് ജാഗ്രത പാലിക്കണമെന്നും ജില്ലാ മെഡിക്കല് ഓഫീസര് അറിയിച്ചു. സൂര്യാഘാത ലക്ഷണങ്ങള് കണ്ടാല് ഉടന് വൈദ്യസഹായം തേടണമെന്നും ജില്ലാ മെഡിക്കല് ഓഫീസര് അറിയിച്ചു.
താപനില ഉയരുന്നത് മൂലമുള്ള ശാരീരിക ബുദ്ധിമുട്ടുകള് ഒഴിവാക്കാന് സ്വയം പ്രതിരോധം വളരെ പ്രധാനമാണ്. നേരിട്ട് വെയിലേല്ക്കുന്ന ജോലി ചെയ്യുന്നവര് ജോലി സമയം ക്രമീകരിക്കണം. കാലത്ത് 11 മണി മുതല് മൂന്ന് മണി വരെ നേരിട്ട് വെയില് കൊള്ളാതെ ശ്രദ്ധിക്കണം. മരത്തണലിലേക്കോ മറ്റു തണല് പ്രദേശത്തേക്കോ മാറിനില്ക്കണം. വെയിലത്തു നടക്കേണ്ടി വരുമ്പോള് കുട, തൊപ്പി, ടവ്വല് എന്നിവ ഉപയോഗിക്കണം. പുറത്തു പോകുമ്പോള് ഷൂസ് അല്ലെങ്കില് ചെരിപ്പ് നിര്ബന്ധമായും ധരിക്കണം. പാര്ക്ക് ചെയ്തിരിക്കുന്ന വാഹനങ്ങളില് കുട്ടികളെയും പ്രായമായവരെയും ഇരുത്തി പോകുന്നത് ഒഴിവാക്കണം. കഴിവതും ഇളം നിറമുള്ള പരുത്തി വസ്തങ്ങള് ഉപയോഗിക്കണം. ഇടക്ക് കൈ കാല്, മുഖമെല്ലാം ശുദ്ധജലമുപയോഗിച്ച് കഴുകണം. ചെറിയ കുട്ടികള്, പ്രായാധിക്യം മൂലമുള്ള ശാരീരിക പ്രശ്നങ്ങള് അനുഭവിക്കുന്നവര്, ഗര്ഭിണികള്, അസുഖ ബാധകാരണം ക്ഷീണമനുഭവിക്കുന്നവര് പ്രത്യേകം ശ്രദ്ധിക്കണം. കയ്യില് പുറത്തു പോകുമ്പോള് എപ്പോഴും വെള്ളം കരുതണം, ശരീരത്തിലെ ജല നഷ്ടത്തിലൂടെ നിര്ജലീകരണം ഉണ്ടാകാന് സാധ്യതയുള്ളതിനാല് ദാഹം ഇല്ലെങ്കിലും ഇടക്കിടെ ശുദ്ധജലം കുടിക്കണം, ശാരീരിക അധ്വാനമനുസരിച്ചും , വിയര്പ്പനുസരിച്ചും കൂടുതല് വെള്ളം കുടിക്കണം. സംഭാരം, ഇളനീര്, നാരങ്ങ വെള്ളം ഇവയെല്ലാം ധാരാളം കഴിക്കാം. വൃത്തിയും ശുചിത്വവുമുള്ള സാഹചര്യങ്ങളില് സൂക്ഷിക്കുന്ന പാനീയങ്ങള് മാത്രം ഉപയോഗിക്കാന് ശ്രദ്ധിക്കണം. ജ്യൂസില് ഉപയോഗിക്കുന്ന ഐസ് ശുദ്ധജലം കൊണ്ടുണ്ടാക്കുന്നതാവണം. മദ്യം, ചായ, കാപ്പി, കാര്ബണേറ്റഡ് സിന്തറ്റിക് കോളകള് എന്നിവയുടെ ഉപയോഗം നിയന്ത്രിക്കണം. ജലാംശം കൂടുതലുള്ള പഴങ്ങളും, പച്ചക്കറികളും വൃത്തിയായി കഴുകി ഉപയോഗിക്കാവുന്നതാണ്.
വീട്ടില് സൂര്യപ്രകാശം നേരിട്ട് ഏല്ക്കാത്ത രീതിയില് ജനാലകളും കര്ട്ടനകളും തയ്യാറാക്കണം. രാത്രിയില് കൊതുക് , മറ്റ് ജീവികള് എന്നിവ കയറാത്ത രീതിയില് ജനലും കര്ട്ടനും തുറന്ന് തണുത്തുവായു അകത്തേക്ക് പ്രവേശിപ്പിക്കാനുള്ള സാഹചര്യം ഉണ്ടാക്കണം. പകല്സമയത്ത് കഴിവതും താഴത്തെ നിലകളില് സമയം ചെലവഴിക്കണം.
വളരെ ഉയര്ന്ന ശരീര താപം, വറ്റി വരണ്ട , ചുവന്ന, ചൂടായ ശരീരം, ശക്തമായ തലവേദന, തലകറക്കം, മന്ദഗതിയിലുള്ള നാഡീമിടിപ്പ് , മാനസികാവസ്ഥയിലെ വ്യതിയാനങ്ങള് , അബോധാവസ്ഥ ,തൊലി ചുകന്ന് തടിക്കല് , വേദന, പൊള്ളല്, തൊലിപ്പുറത്ത് കുരുക്കള് ഉണ്ടാവുക , പേശീവലിവ്, ഓക്കാനം, ഛര്ദ്ദി, മൂത്രത്തിന്റെ അളവ് കുറഞ്ഞ് മഞ്ഞ നിറമാകുക എന്നിവയെല്ലാം സൂര്യാഘാതമോ , സൂര്യതാപമോ ഏറ്റതിന്റെ ലക്ഷണങ്ങളാകാം. ഈ ലക്ഷണങ്ങള് ഉണ്ടായാല് അടിയന്തിരമായി വൈദ്യസഹായം തേടണമെന്നും ജില്ലാ മെഡിക്കല് ഓഫീസര് അറിയിച്ചു
വെയിലിന് കാഠിന്യം കൂടുന്നു; ജാഗ്രത പാലിക്കണമെന്ന് ആരോഗ്യവകുപ്പ്
Leave a Reply
- Trending
- Comments
- Latest
