ബിജെപി നേതാവ് സന്ദീപ് വാര്യർ സിപിഎമ്മിലേക്കെന്ന് സൂചന. ബിജെപിയുമായി ഇടഞ്ഞു നില്‍ക്കുന്ന അദ്ദേഹം സിപിഎം നേതാക്കളുമായി ചർച്ച നടത്തിയെന്നാണ് പുറത്തുവരുന്ന വിവരങ്ങള്‍.
കഴിഞ്ഞ ദിവസം പാലക്കാട്ടെ എൻഡിഎ സ്ഥാനാർഥി സി.കൃഷ്ണകുമാറിന്‍റെ തെരഞ്ഞെടുപ്പ് കണ്‍വൻഷനില്‍ അദ്ദേഹത്തിന് സ്റ്റേജില്‍ ഇരിപ്പിടം നല്‍കിയിരുന്നില്ല.നിരവധി മുതിര്‍ന്ന നേതാക്കള്‍ പങ്കെടുത്ത കണ്‍വന്‍ഷനില്‍ അണികളോടൊപ്പം വേദിയിലായിരുന്നു സന്ദീപ് ഇരുന്നത്.
ഇതേ തുടർന്ന് അദ്ദേഹം തെരഞ്ഞെടുപ്പ് പ്രചാരണങ്ങളില്‍ നിന്ന് വിട്ടു നില്‍ക്കുകയായിരുന്നു. അതേസമയം സന്ദീപ് വാര്യർക്ക് മുന്നില്‍ വാതില്‍ തുറന്നിട്ടിരിക്കുകയാണെന്ന് സിപിഎം നേതാവ് എ.കെ.ബാലൻ പറഞ്ഞു. സന്ദീപ് വാര്യർ നിലപാട് വ്യക്തമാക്കിയാല്‍ സിപിഎം ചർച്ച ചെയ്യുമെന്നും അദ്ദേഹം വ്യക്തമാക്കി.
